(អាល្លឺម៉ង់)៖ ប្រធានាធិបតីអាមេរិក លោក ដូណាល់ ត្រាំ បានថ្លែងថាលោកនៅតែចង់ឲ្យ ប្រទេសម៉ិចស៊ីកូចេញថ្លៃចំណាយលើគម្រោង​ការសង់ជញ្ជាំងតាមបណ្តាញព្រំដែនប្រទេសទាំងពីរដដែល បន្ទាប់ពីរូបលោក បានជួបពិភាក្សាគ្នាជាលើកដំបូងជាមួយមេដឹកនាំម៉ិច​ស៊ី​កូ ក្នុងជំនួបក្រៅផ្លូវការនៃកិច្ចប្រជុំ G20 នៅទីក្រុង Hamburg នៃប្រទេសអាល្លឺម៉ង់។ នេះបើតាមការចេញផ្សាយសារព័ត៌មាន Channel News Asia នៅយប់ថ្ងៃសុក្រ ទី០៧ ខែកក្កដា ឆ្នាំ២០១៧។

នៅពេលត្រូវក្រុមអ្នកសារព័ត៌មានចោទសួរ ថាតើលោកនៅតែមានបំណងចង់ឲ្យម៉ិចស៊ីកូ ធ្វើការបង់ថ្លៃសម្រាប់ការចំណាយលើការ​សាងសង់ជញ្ជាំងនៅតាមខ្សែបន្ទាប់ព្រំដែន នៃប្រទេសជិតខាងទាំងពីរដូចដើមដដែលឬយ៉ាងណានោះ លោក ដូណាល់ ត្រាំ បាន​ឆ្លើយ​តបយ៉ាងខ្លីថា «ប្រាកដណាស់»។ ដោយឡែក ប្រធានាធិបតីម៉ិចស៊ីកូលោក Enrique Pena Nieto ពុំបានធ្វើ​បញ្ជាក់​អ្វី​ច្បាស់​នោះឡើយ​ ដោយលោកគ្រាន់ត្រឹមបានលើកឡើងថា «ជំនួបពិភាក្សានេះ នឹងជួយប្រទេសទាំងពីរបន្តធ្វើកិច្ចសន្ទនាយ៉ាងរលូត សម្រាប់សន្តិសុខ​នៃប្រជាជាតិទាំងសងខាង ជាពិសេស​នោះគឺសម្រាប់ព្រំប្រទល់របស់ពួកយើង»។

គួររំលឹកថាកាលពីខែមករា នៅពេលដែលលោក ត្រាំ បានស្បថឡើងកាន់តំណែងភ្លាមៗនោះ លោក Pena Nieto បានលុបចោល​ដំណើរទស្សនកិច្ចទៅកាន់រដ្ឋធានីវ៉ាស៊ីនតោន ជាការឆ្លើយតបចំពោះការទទូចជាដដែលរបស់លោកប្រធានាធិបតីអាមេរិក ដែលចង់​ឲ្យ​ប្រទេសម៉ិចស៊ីកូ ចេញថ្លៃសម្រាប់ការសាងសង់ជញ្ជាំងព្រំដែន៕