(មីយ៉ាន់ម៉ា)៖ អគ្គមេបញ្ជាការយោធាមីយ៉ាន់ម៉ា លោក Min Aung Hlaing បាននិយាយថា គ្រោះថ្នាក់ធ្លាក់យន្ដហោះយោធាមួយគ្រឿង កាលពីថ្ងៃទី០៧ ខែមិថុនា គឺជាការបាតបង់មួយដ៏ធំ សម្រាប់កងទ័ព និងប្រជាជាតិមីយ៉ាន់ម៉ាទំាងមូល។ នេះបើតាមការចេញផ្សាយដោយ ទីភ្នាក់ងារសារព័ត៌មានចិនស៊ិនហួរ នៅព្រឹកថ្ងៃអង្គារ ទី០៤ ខែកក្កដា ឆ្នាំ២០១៧។
ការថ្លែងបែបនេះរបស់ លោក Min Aung Hlaing ធ្វើឡើងនៅក្នុងជំនួបមួយនៅទីស្នាក់ការកណ្ដាលកងទ័ព ក្នុងរដ្ឋធានី Nay Pyi Taw ដែលត្រូវបានសារព័ត៌មាននៅក្នុងស្រុកចុះផ្សាយនៅ ថ្ងៃអង្គារនេះ។ លោក Min បានលើកឡើងយ៉ាងដូច្នេះថា «ការបាត់បង់ជីវិតមនុស្សជាច្រើននាក់ នៅក្នុងឧបទ្ទវហេតុនេះ គឺជាការបាត់បង់ដ៏ធំធេងចំពោះកងទ័ព និងប្រជាជាតិមីយ៉ាន់ម៉ាទំាងមូល»។ មេ ទ័ពកំពូលមីយ៉ាន់ម៉ារូបនេះ ក៏បានអរគុណដល់ក្រុមអ្នកជួយសង្រ្គោះផងដែរ ខណៈប្រតិបត្តិការរុករក នឹងបន្តធ្វើឡើងអាស្រ័យលើលក្ខខណ្ឌអាកាសធាតុ។
គួររំលឹកថា បើតាមយោធាមីយ៉ាន់ម៉ា មនុស្ស១២២នាក់ក្នុងនោះមានទាំងយោធា១០៨នាក់ និងក្រុមសហសេវិក ១៤នាក់ បានជិះនៅលើយន្ដហោះយោធា Myanmar Air Force ដែលបានធ្លាក់ចូលទៅក្នុងសមុទ្រ Andaman ហើយមកទល់ពេលបច្ចុប្បន្ន សាកសពមនុស្ស ៩២នាក់ ត្រូវគេបានស្រង់ចេញពីទឹកសមុទ្រ ប៉ុន្តែគេបានសន្មត់បានថា មនុស្សទាំង ១២២នាក់ គឺបានស្លាប់បាត់ជីវិតទាំងអស់ទៅហើយ៕
