(បរទេស)៖ អង្គការ NASA សហការជាមួយសាកលវិទ្យាល័យអាមេរិក Stanford បានធ្វើការអភិវឌ្ឍប្រភេទរ៉ូបូតថ្មីមួយ ដើម្បីជួយបោសសម្អាតសំរាមអវកាសដ៏ច្រើនសន្ធឹកសន្ធាប់ ចេញពីគន្លងជុំវិញភពផែនដី។ នេះបើតាមការដកស្រង់ការផ្សាយចេញពីសារព័ត៌មាន Telegraph នៅរសៀលថ្ងៃព្រហស្បតិ៍ ទី២៩ ខែមិថុនា ឆ្នាំ២០១៧។
បច្ចុប្បន្ននេះមានម្ទេចកម្ទីរនៃវត្ថុ ដែលផលិតឡើងដោយមនុស្សប្រមាណ ៥០០,០០០បំណែក កំពុលតែលតោលជុំវិញភពរបស់យើង នៅក្នុងល្បឿនមិនសូវជាយឺតប៉ុន្មាននោះឡើយ ពោលគឺជិត ៣០,០០០គីឡូម៉ែត្រក្នុងមួយម៉ោងឯណោះ ហើយអ្នកជំនាញជាច្រើនបានព្យាករណ៍ថា ប្រសិនបើបញ្ហាដ៏សំខាន់នេះ នៅតែមិនត្រូវបានដោះស្រាយឲ្យបានឆាប់ទេនោះ វាអាចបង្កការរះរាំងស្ទះដល់បេសកកម្មទៅកាន់ទីអវកាសនាពេលអនាគតខាងមុខបាន។ ម៉្យាងវិញទៀត កាកសំណល់ទាំងនោះ រួមមានផ្កាយរណបខូចៗ កម្ទេចកម្ទីរនៃយានអវកាស និងបំណែកគ្រាប់រ៉ុក្កែតដែលប្រើប្រាស់រួចជាដើម បានបង្កការគំរាមកំហែងរួចជាស្រេចទៅហើយដល់ ប្រព័ន្ធទូរគមនាគន៍ យានអវកាស និងក្រុមអវកាសយានិកជាដើម។
ដោយឡែកការចាប់ប្រមូលយកសំរាមទាំងនោះ គឺពុំមែនជាកិច្ចការងាយស្រួលឡើយនៅក្នុងលំហអាកាស ដោយសារតែសារធាតុចាំបាច់មួយចំនួន មិនដំណើរការ ឬមានប្រសិទ្ធភាពនៅក្នុងទីអវកាសនោះទេ។ ក៏ប៉ុន្តែ NASA និងសាកលវិទ្យាល័យ Standford ក្នុងអំឡុងពេលជាច្រើនឆ្នាំកន្លងមកនេះ បានសម្ងំអភិវឌ្ឍន៍ម៉ាស៊ីនរ៉ូបូតស៊េរីថ្មីមួយប្រភេទ ដើម្បីជួយសម្រួល ក៏ដូចជាដោះស្រាយបញ្ហាបោសសម្អាតសំរាមអវកាសនេះ។ រ៉ូបូតនោះត្រូវបានរចនាឡើង ដោយយកតាមលំនាំជើងរបស់សត្វតុកកែ ដែលអាចនៅជាប់នឹងជញ្ជាំងបាន។
រ៉ូបូតដែលជាប្រភេទចាប់យកនោះ ត្រូវបានចាប់ផ្តើមអភិវឌ្ឍន៍ឡើងចាប់តាំងពីប្រមាណជា ១០ឆ្នាំមុនមកម្ល៉េះ ហើយក្រុមការងារនៃគម្រោងនេះ ក៏បានបញ្ជូនម៉ាស៊ីនរ៉ូបូតឡើងទៅកាន់ស្ថានីយ៍អវកាសអន្តរជាតិ (ISS) ផងដែរ ហើយពួកគេមានការពេញចិត្ត និងត្រេកអរជាខ្លាំងជាមួយនិងលទ្ធផលដែលទទួលបាន។ ចំណែកជំហានបន្ទាប់ទៀតវិញ គឺការសាកល្បងឧបករណ៍បោសសម្អាតសំរាមអវកាសនេះ នៅក្នុងលំហអាកាសផ្ទាល់តែម្តង។
គួរបញ្ជាក់ថា អង្គការ NASA និងសាកលវិទ្យាល័យ Standford ក៏កំពុងតែធ្វើការទៅលើជំនាន់ថ្មីមួយផ្សេងទៀត នៃឧបករណ៍រ៉ូបូតនេះ ដែលមានសមត្ថភាពអាចធន់នឹងកម្រិតវិទ្យុសកម្មដ៏ខ្ពស់ៗ នៅទីអវកាសបានផងដែរ៕
