(បាងកក)៖ អត្រានៃចំនួនប្រជាជនដែលជំពាក់បំណុលគេ នៅក្នុងប្រទេសថៃបានស្ថិតក្នុងកម្រិតដ៏ខ្ពស់ ពោលគឺនៅលេខរៀងទីបីប្រចាំតំបន់អាស៊ីប៉ាស៊ីហ្វិក កាលពីត្រីមាសទីបីនៃឆ្នាំ២០១៦កន្លងទៅ។ នេះបើតាមការដកស្រង់ការផ្សាយចេញពីសារព័ត៌មានថៃ បាងកកប៉ុស្តិ៍ នៅព្រឹកថ្ងៃព្រហស្បតិ៍ ទី២៩ ខែមិថុនា ឆ្នាំ២០១៧។
លោក Sommarat Chantarat ប្រធាននាយកដ្ឋានហិរញ្ញវត្ថុ នៃវិទ្យាស្ថានស្រាវជ្រាវសេដ្ឋកិច្ច Puey Ungphakorn (PIER) បានឲ្យដឹងថា «អត្រានៃអ្នកជំពាក់បំណុលគេនៅក្នុងប្រទេសថៃ បានជាប់ក្នុងកំណត់ត្រាជាប្រទេស ដែលមានអត្រានេះដ៏ខ្ពស់បំផុតមួយ ប្រចាំតំបន់អាស៊ីប៉ាស៊ីហ្វិក និងស្ថិតនៅក្នុងកម្រិតស្មើនឹងបណ្តាប្រទេសអភិវឌ្ឍន៍នានាដែរ ក៏ប៉ុន្តែសមត្ថភាពនៃការរកប្រាក់សងបំណុលគេវិញនោះ ប្រហែលជាមិនដូចទៅនឹងបណ្តាប្រទេសទាំងនោះឡើយ»។
គួរបញ្ជាក់ថា យោងតាមធនាគារថៃ BIS បំណុលសរុបរបស់ប្រជាជនថៃទាំងអស់កាលពីត្រីមាសទីបីនៃឆ្នាំ២០១៦ គឺស្មើនឹង៧១ភាគនៃទំហំប្រាក់ចំណូលក្នុងស្រុកសរុប (GDP) របស់ប្រទេសដោយស្ថិតនៅពីក្រោយតែប្រទេសអូស្រ្តាលី (១២៣ភាគរយ) និងកូរ៉េខាងត្បូង (៩១.៦ភាគរយ) ប៉ុណ្ណោះ៕
