(ម៉ានីល)៖ ប្រធានាធិបតីហ្វីលីពីន លោក រ៉ូឌ្រីហ្គោ ឌូតឺតេ បានព្រមានទម្លាក់គ្រាប់បែកបន្ថែមទៀត ទៅលើខេត្ត​​មីនដាណាវ ភាគខាងត្បូងប្រទេស ដើម្បីជីកឬសគល់បណ្តាញភេរវករ ISIS ឲ្យអស់តែម្តង ខណៈដែលសង្គ្រាម​បានអូសបន្លាយមកជិតមួយខែទៅហើយ ដែលបានបណ្តាលឲ្យមនុស្សរាប់រយនាក់ស្លាប់។ នេះបើតាមការចេញ​ផ្សាយដោយទីភ្នាក់ងារព័ត៌មានចិនស៊ិនហួរ នាព្រឹកថ្ងៃពុធ ទី២១ ខែមិថុនា ឆ្នាំ២០១៧។

ថ្លែងប្រាប់ក្រុមអ្នកសារព័ត៌មាននៅយប់​ថ្ងៃអង្គារ ក្នុងទីក្រុង Cagayan de ទីដែលលោក ឌូតឺតេ ចុះទៅសួរសុខ​ទុក្ខនាយទាហានដែលរងរបួសក្នុងសង្គ្រាមនៅភាគខាងត្បូងប្រទេសនោះ បុរសខ្លាំងរបស់ជាតិហ្វីលីពីនរូបនេះ​សង្កត់ធ្ងន់ថា «នៅថ្ងៃខាងមុខនេះ ក្រុមភេរវករដែលជាបណ្តាញនៃ ISIS ទាំងអស់នេះ នឹងត្រូវទទួលរងការទម្លាក់​គ្រាប់បែក។ សង្គ្រាមនឹងអាចរាលដាលពាសពេញខេត្តមីនដាណាវ និងបណ្តាកោះមួយចំនួនទៀត ដែលជា​ទីឈរ​ជើងរបស់ពួកភេរវករ អាប៊ូ សាយយ៉ាហ្វ និង Maute»។

គួរបញ្ជាក់ថា ក្រុមភេរវករភាគខាងត្បូង និងយោធារដ្ឋាភិបាលហ្វីលីពីន បានផ្ទុះសង្គ្រាមជាមួយគ្នានៅទីក្រុង​ Marawi ក្នុងខេត្តមីនដាណាវ តាំងពីថ្ងៃទី២៣ ខែឧសភាមកម្ល៉េះ ដោយក្នុងនោះតួលេខ​ចុងក្រោយដែល​ត្រូវបាន​រដ្ឋាភិបាលហ្វីលីពីនបញ្ចេញជាផ្លូវការនោះ គឺមនុស្ស​សរុប ៣៤៩នាក់បានស្លាប់ ក្នុងនោះជាង ២០០នាក់ គឺជាពួក​សកម្ម​ប្រយុទ្ធ ខណៈយោធា និងជនស៊ីវិល​ជាច្រើននាក់ក៏បានបាត់បង់​ជីវិតផងដែរ៕