(មូស្គូ)៖ ក្រសួងការពារជាតិរុស្ស៊ីបានព្រមានសហរដ្ឋអាមេរិក ក៏ដូចជាបង្ហាញពីបំណងចង់តម្រង់ក្បាលគ្រាប់មីស៊ីល ឆ្ពោះទៅរកយន្ដហោះចម្បាំងរបស់ក្រុមចំរុះអន្តរជាតិ ដែលហោះហើរនៅលើប្រទេសស៊ីរី ព្រមទំាងផ្អាកខែ្សទូរស័ព្ទទំនាក់ទំនងយោធា ជាមួយទីក្រុងវ៉ាស៊ីនតោនទៀតផង បន្ទាប់ពីយន្ដហោះចម្បាំងស៊ីរីមួយគ្រឿង ត្រូវបានបាញ់ទម្លាក់កាលពីថ្ងៃអាទិត្យ។ នេះបើតាមការចេញផ្សាយដោយសារព័ត៌មាន BBC នៅព្រឹកថ្ងៃអង្គារ ទី២០ ខែមិថុនា ឆ្នាំ២០១៧។
យោងតាមសេចក្ដីថ្លែងការណ៍របស់ខ្លួន ក្រសួងការពារជាតិរុស្ស៊ីបានបញ្ជាក់យ៉ាងដូច្នេះថា «យន្ដហោះចម្បាំង និងយន្ដហោះគ្មានមនុស្សបើករបស់ក្រុមចំរុះអាមេរិក ត្រូវបានចាត់ទុកជា គោលដៅរបស់ប្រព័ន្ធការពារដែនអាកាស និងគ្រប់មធ្យោបាយការពារដែនអាកាសរុស្ស៊ីទំាងអស់នៅស៊ីរី»។ ប៉ុន្តែប៉ុន្មានម៉ោងក្រោយមក សហរដ្ឋអាមេរិកបានអះអាងថា ខ្លួននឹងបង្កើតខែ្សទូរស័ព្ទសម្រាប់ធ្វើទំនាក់ទំនងយោធាឡើងវិញជាមួយរុស្ស៊ី ដែលបានដំណើរការអស់រយៈពេលជាង ០៨ខែមកនេះ ដើម្បីទប់ស្កាត់ឧប្បដិហេតុយោធាណាមួយ កើតឡើងរវាងប្រទេសទាំងពីរ។
គួរបញ្ជាក់ថា កាលពីថ្ងៃអាទិត្យកងកម្លាំងរដ្ឋាភិបាលស៊ីរីបានប្រកាសថា ក្រុមចំរុះអន្តរជាតិ ដឹកនាំដោយសហរដ្ឋអាមេរិក បានបាញ់ទម្លាក់យន្ដហោះចម្បាំងមួយគ្រឿងរបស់ខ្លួន ដែលកំពុងដឹកនាំប្រតិបត្តិការកម្ទេចពួក ISIS នៅក្នុងខេត្ត Raqqa ហើយព្រមពេលជាមួយគ្នា ទីក្រុងវ៉ាស៊ីនតោន ក៏បានទទួលស្គាល់ព័ត៌មាននេះដែរ ដោយអះអាងថា វាគឺជាការឆ្លើយតបទៅនឹងការវាយប្រហាររបស់យន្ដហោះចម្បំាងរដ្ឋាភិបាលស៊ីរី ទៅលើកងកម្លាំងប្រជាធិបតេយ្យស៊ីរី ដែលមានសហរដ្ឋអាមេរិកជាខ្នងបង្អែក។
ទោះបីជាយ៉ាងណាក៏ដោយ ការបាញ់ទម្លាក់យន្ដហោះស៊ីរីនេះ កើតឡើងនៅចំថ្ងៃតែមួយដែលអ៊ីរ៉ង់ បាញ់មីស៊ីលជាច្រើនគ្រាប់ស្រោចលើមូលដ្ឋានក្រុម ISIS នៅលើទឹកដីស៊ីរី ដូច្នេះហើយទើបធ្វើឱ្យក្រុមអ្នកជំនាញមួយចំនួនគិតថា ទីក្រុងវ៉ាស៊ីនតោន «ចង់សម្លាប់មាន់ គំរាមស្វា» ពោលបើនិយាយឱ្យចំ សហរដ្ឋអាមេរិក ចង់យកការបាញ់ទម្លាក់យន្ដហោះចម្បាំងនេះ ព្រមានអ៊ីរ៉ង់ឱ្យប្រយ័ត្នចំពោះការធ្វើ ប្រតិបត្តិការយោធានៅក្នុងប្រទេសស៊ីរី៕
