(ប៉ារីស)៖ ជនសង្ស័យម្នាក់បានបើករថយន្តមួយគ្រឿងដែលមានផ្ទុកសារធាតុផ្ទុះ សំដៅទៅបុកក្បួនរថយន្តរបស់កម្លាំងប៉ូលិស នៅលើដងវិថី Champs-Elysees ក្នុងទីក្រុងប៉ារីស ប៉ុន្តែពុំមានឲ្យមានគ្រោះថ្នាក់ដល់សមត្ថកិច្ចនោះឡើយ ហើយរដ្ឋមន្រ្តីក្រសួងមហាផ្ទៃនៃប្រទេសបារាំងបានបញ្ជាក់ថា ជនដៃដល់រូបនោះ បានបាត់បង់ជីវិតហើយ បន្ទាប់ពីបានព្យាយាមវាយប្រហារទៅលើកម្លាំងសន្តិសុខ។ នេះបើតាមការចេញផ្សាយដោយសារព័ត៌មាន ABC News នៅយប់ថ្ងៃចន្ទ ទី១៩ ខែមិថុនា ឆ្នាំ២០១៧។
រដ្ឋមន្រ្តីមហាផ្ទៃបារាំងលោក Gerard Collomb បានថ្លែងប្រាប់ក្រុមអ្នកសារព័ត៌មាននៅក្បែរកន្លែងកើតហេតុ ដែលស្ថិតនៅចម្ងាយមិនឆ្ងាយប៉ុន្មានពីវិមានប្រធានាធិបតីបារាំង Elysees និងស្ថានទូតសហរដ្ឋអាមេរិកនោះឡើយថា គោលបំណងនៅពីក្រោយសកម្មភាពវាយប្រហាររបស់បុរសជាជនដៃដល់នេះ ពុំទាន់ត្រូវបានដឹងច្បាស់នៅឡើយទេ ខណៈការស៊ើបអង្កេតក៏ត្រូវបានធ្វើឡើងផងដែរ ប៉ុន្តែអាជ្ញាធរដឹងថាបុរសវ័យ៣១ឆ្នាំរូបនេះ មានឈ្មោះនៅក្នុងបញ្ជីនៃបុគ្គលដែលអាចមានជាប់ពាក់ព័ន្ធនឹងក្រុមជ្រុលនិយម។
នេះគឺជាការប៉ុនប៉ងវាយប្រហារលើកទីពីរហើយ នៅលើដងវិថីដ៏ល្បីប្រចាំទីក្រុងប៉ារីសនេះ ដែលសម្បូរទៅដោយភ្ញៀវទេសចរធ្វើដំណើរទស្សនាកម្សាន្ត នៅក្នុងឆ្នាំ២០១៧នេះ ដោយកាលពីខែមេសាកន្លងទៅ បុរសម្នាក់បានបាញ់ស្លាប់មន្រ្តីប៉ូលិសមួយរូប នៅលើដងវិថី Champs-Elysees៕
