(អាមេរិក)៖ កាសែត Washington Post របស់អាមេរិក បានចេញផ្សាយនៅមុននេះបន្តិចថា ក្រសួងការពារជាតិអាមេរិកបានប្រកាសអំពីការបាញ់ទម្លាក់យន្តហោះចម្បាំងស៊ីរីមួយគ្រឿង ដោយយន្តហោះចម្បាំងរបស់អាមេរិក នៅក្បែរទីក្រុង Raqqah ដែលជាទីដ៏ធំមួយរបស់បណ្តាញភេរវករ ISIS ឈរជើងក្នុងទឹកដីប្រទេសស៊ីរី។ នេះបើតាមការចេញផ្សាយព័ត៌មាន នាព្រឹកថ្ងៃចន្ទ ទី១៩ ខែមិថុនា ឆ្នាំ២០១៧។
មន្ទីរបញ្ចកោណអាមេរិកក៏បានចេញសេចក្តីថ្លែងការណ៍មួយផងដែរថា កងទ័ពអាកាសដឹកនាំដោយអាមេរិក បានធ្វើការចល័តដោយឥតព្រាងទុក ដើម្បីទប់ទល់នឹងយន្តហោះចម្បាំងស៊ីរីប្រភេទ Su-22 ដែលបានធ្វើការទម្លាក់គ្រាប់បែកទៅលើទីតាំងរបស់សម្ព័ន្ធមិត្តអាមេរិក ដែលកំពុងតែប្រយុទ្ធប្រឆាំង នឹងក្រុមរដ្ឋអ៊ីស្លាម ISIS ស្ថិតនៅភាគខាងត្បូងទីក្រុង Tabqah ដែលមានចម្ងាយតែជាង ៣០គីឡូម៉ែត្រប៉ុណ្ណោះ ពីភាគខាងលិចទីក្រុង Raqqah។ ទីបំផុតយន្តហោះ Su-22 មួយគ្រឿងត្រូវបានបាញ់ទម្លាក់តែម្តង នៅថ្ងៃអាទិត្យ។
គួរបញ្ជាក់ថា កងកម្លាំងឃើដ និង អារ៉ាប់ ឬដែលយើងអាចហៅបានថា កងកម្លាំងស៊ីរីសេរី (SDF) នោះគឺជាកងកម្លាំងដែលគាំទ្រដោយសហរដ្ឋអាមេរិក ក្នុងការប្រយុទ្ធប្រឆាំងទ្រង់ទ្រាយធំទៅលើក្រុម ISIS ក្នុងតំបន់ Raqqah ដែលត្រូវបានបណ្តាញភេរវករលេខ១លើលោកនេះប្រកាសថា ជារដ្ឋធានីរបស់ពួកគេក្នុងទឹកដីស៊ីរី។ ទោះបីជាក្រុមកម្លាំងគាំទ្រដោយអាមេរិក អាចដណ្តើមបានទីក្រុង Tabqah ក៏ពិតមែន ប៉ុន្តែក្រុម ISIS នៅតែអាចកាន់កាប់ផ្នែកជាច្រើននៃតំបន់ឆ្នេរខ្សាច់ លាតសន្ធឹងនៅភាគខាងត្បូងទីក្រុងនេះដដែល។
នេះគឺជាលើកទីពីរហើយ នៅក្នុងរដ្ឋបាលរបស់ លោក ដូណាល់ ត្រាំ ដែលអាមេរិកបានធ្វើវាយប្រហារដោយបើកចំហទៅលើកងកម្លាំងស៊ីរី ដោយលើកទីមួយនោះគឺការបាញ់ស្រោចមីស៊ីល ៥៩គ្រាប់ ទៅលើមូលដ្ឋានទ័ពស៊ីរី ដែលប្រធានាធិបតីអាមេរិក កំពុងជាប់ការសង្ស័យរូបនេះបានអះអាងថា ជាការសងសឹកនឹងរដ្ឋាភិបាល លោក បាស្សា អាល់ អាស្សាដ ដែលបានប្រើប្រាស់អាវុធគីមី សម្លាប់អាយុជីវិតកុមារស្លូតត្រង់ជាង ២០នាក់កាលពីប៉ុន្មានខែមុន៕
