(ឡុងដ៍)៖ ប៉ួលិសនៃទីក្រុងឡុងដ៍បានបញ្ជាក់នាថ្ងៃសៅរ៍នេះថា មានមនុស្សយ៉ាងតិចចំនួន៥៨នាក់ជាប់នៅក្នុងអគារ ហើយសង្ស័យបានបាត់បង់ជីវិតនៅក្នុងគ្រោះអគ្គីភ័យដ៏សន្ធោសន្ធៅកាលពីប៉ុន្មានថ្ងៃមុននេះ ដែលបានឆាបឆេះអគារខុនដូកម្ពស់២៤ជាន់មួយកន្លែង នៅទីក្រុងឡុងដ៍។ នេះបើតាមការចេញផ្សាយដោយសារព័ត៌មាន Hindustan Times នៅយប់ថ្ងៃសៅរ៍ ទី១៧ ខែមិថុនា ឆ្នាំ២០១៧។
លោក Stuart Cundy មេបញ្ជាការប៉ូលិសប្រចាំទីក្រុងឡុងដ៍បានថ្លែងថា «គួរឲ្យសោកស្តាយនាខណៈពេលនេះ មនុស្សចំនួន៥៨នាក់ដែលយើងទទួលដំណឹងថា បានស្ថិតក្នុងអគារកើតហេតុកាលពីយប់ដែលសោកនាដកម្មបានកើតឡើង ហើយពួកគេទាំងនោះនៅតែបន្តបាត់ខ្លួនដដែល ដូច្នេះហើយពួកយើងត្រូវតែធ្វើការ សន្មត់ថាជនទាំងអស់នោះបានបាត់បង់ជីវិតហើយ គិតមកទល់ពេលនេះ។ យ៉ាងណាមិញលោក Cundy បានបន្ថែមថា តួលេខនេះអាចនឹងផ្លាស់ប្តូរ នាពេលខាងមុខទៀត។
អគារខាងលើនេះមានឈ្មោះថា Grenfell Tower ស្ថិតនៅក្នុងសង្កាត់ North Kensington ភាគខាងលិចទីក្រុងឡុងដ៍ ដែលត្រូវបានគេរាយការណ៍ថា បានទទួលរងការឆាបឆេះកាលពីវេលាម៉ោង ១៖១៦នាទីយប់ថ្ងៃពុធសប្តាហ៍នេះ (ម៉ោងក្នុងតំបន់) ចាប់តាំងពីជាន់ទីពីរ រហូតដល់ជាន់លើបំផុត ហើយក្រុមពន្លត់អគ្គីភ័យដល់ទៅជាង ២០០នាក់ បានចូលរួមពន្លត់គ្រោះអគ្គីភ័យដ៏ធំសម្បើមនេះ។ មនុស្សរាប់រយនាក់ រួម មានទាំងកុមារ និងជនចាស់ជរា ត្រូវគេជឿជាក់ថា បានស្ថិតក្នុងលំនៅឋានប្រមាណជា១២០ខ្នង ដែលនៅក្នុងអគារកម្ពស់២៤ជាន់នោះ នៅពេលដែលអគ្គីភ័យបានកើតឡើង៕
