(តូក្យូ)៖ រឿងហេតុដ៏កម្រមួយបានកើតឡើង ដោយនាវាពិឃាតរបស់សហរដ្ឋអាមេរិក បានបុកជុលនឹងនាវាដឹក​កុងតឺន័រដោតទង់ជាតិហ្វីលីពីន នៅក្នុងដែនទឹកជិតឆ្នេរសមុទ្ររបស់ប្រទេសជប៉ុន នៅព្រឹកថ្ងៃសៅរ៍នេះតែម្តង ដែលបានបណ្តាលឲ្យមនុស្ស០៧នាក់បាត់ខ្លួន និង០២នាក់រងរបួស។ នេះបើតាមការចេញផ្សាយដោយ Channel News Asia ដកស្រង់ពីទីភ្នាក់ងារព័ត៌មាន AP នាព្រឹកថ្ងៃសៅរ៍ ទី១៧ ខែមិថុនា ឆ្នាំ២០១៧។

នាវាពិឃាតមីស៊ីលអាមេរិកដែលជួបគ្រោះថ្នាក់ខាងលើនេះ មានឈ្មោះថា USS Fitzgerald បានបុកនាវាដឹក​កុងតឺន័រហ្វីលីពីនឈ្មោះ ACX Crystal នៅវេលាម៉ោង ២៖៣០នាទីទៀបភ្លឺថ្ងៃសៅរ៍នេះ ស្ថិតនៅដែនទឹកនៃ​ភាគនិរតីខេត្ត Yokosuka ប្រទេសជប៉ុន។ នេះបើតាមការអះអាងរបស់កងទ័ពជើងទឹកអាមេរិក និងឆ្មាំការពារ​ដែន​សមុទ្ររបស់ហ្វីលីពីន។ សម្រាប់អ្នករងរបួសទាំងពីរនាក់នោះ គឺជាកងទ័ពជើងទឹកអាមេរិក ដែល​រហូតមកដល់ពេលនេះ ពួកគេកំពុងតែ​សម្រាក​ព្យាបាលនៅឯមន្ទីរពេទ្យនៅឡើយ ដោយក្នុងនោះម្នាក់មាន​សភាពរបួសធ្ងន់ធ្ងរណាស់។

បច្ចុប្បន្ននេះ កងកម្លាំងដែនសមុទ្រជប៉ុន កំពុងតែព្យាយាមស្វែងរកមនុស្សបាត់ខ្លួនទាំង០៧នាក់។ នាវាចម្បាំង​អាមេរិកខាងលើនេះមានប្រវែង ១៥៤ម៉ែត្រ បានរងការខូចខាតធ្ងន់គួរសម ប៉ុន្តែដោយមានការជួយទាន់ពេល​វេលារបស់ជប៉ុន ទើបអ្វីៗបានប្រសើរឡើងវិញ ហើយអាមេរិកក៏បានអរគុណដល់ជប៉ុនផងដែរ។ ដោយឡែក​នាវាហ្វីលីពីនវិញ​មានប្រវែងរហូតដល់ ២២២ម៉ែត្រ មានគោលដៅឆ្ពោះទៅតូក្យូ ប៉ុន្តែក៏ជួបគ្រោះថ្នាក់តែម្តង។ សម្រាប់មូលហេតុ​ដែល​នាំកើតហេតុការណ៍នេះ កំពុងស្ថិតនៅក្នុងការ​ស៊ើបអង្កេត៕