(ឡុងដ៍)៖ មកទល់ថ្ងៃសុក្រនេះ អាជ្ញាធរអង់គ្លេស កំពុងមានក្តីព្រួយបារម្ភថា ចំនួនមនុស្សស្លាប់នៅក្នុងករណីគ្រោះអគ្គីភ័យដ៏ធំមួយ ដែលបាន​ឆាបឆេះ​អគារ​ខុនដូកម្ពស់២៤ជាន់ មួយកន្លែងយ៉ាងសន្ធោសន្ធៅ នៅឯទីក្រុងឡុងដ៍នោះ អាចនឹងកើនឡើងលើសពី១០០នាក់ទៅទៀត ទោះបីជាបច្ចុប្បន្នតួ​លេខផ្លូវការ បានបញ្ជាក់សិនថាជនរងគ្រោះដែលបានបាត់ បង់ជីវិតមានត្រឹម១៧នាក់យ៉ាងណាក្តី។ ទន្ទឹមនឹងនេះសេវាសុខាភិបាលអង់គ្លេសក៏បាន​ឲ្យដឹងដែរថា មនុស្សចំនួន២៤នាក់កំពុងបន្តសម្រាកព្យាបាលនៅតាមមន្ទីរពេទ្យជាច្រើន ទូទាំងទីក្រុងឡុងដ៍ ដោយក្នុងនោះមាន១២នាក់ នៅតែស្ថិត​ក្នុងស្ថានភាពធ្ងន់ធ្ងរដដែល។ នេះបើតាមការចេញផ្សាយដោយសារព័ត៌មាន Telegraph នៅរសៀលថ្ងៃសុក្រ ទី១៦ ខែមិថុនា ឆ្នាំ២០១៧។

យោងតាមប៉ូលិសអង់គ្លេស មនុស្សយ៉ាងតិចចំនួន១៧នាក់បានស្លាប់ ហើយចំនួននេះ​ត្រូវបានគេរំពឹងថា អាចនឹង​បន្តកើនឡើង ​ត្បិត​មនុស្ស​ជា​ច្រើន​នាក់ នៅតែបន្តបាត់ខ្លួននៅ​ឡើយដែល​ត្រូវ​គេ​សង្ស័យថា បានជាប់ខ្លួននៅក្នុងអគារ​កើតហេតុ។ មកទល់ពេលនេះ មូលហេតុនៃអគ្គិភ័យក៏ពុំ​ទាន់​ត្រូវ​​បាន​គេ​បញ្ជាក់​​ឱ្យ​ច្បាស់នោះទេ ស្របពេលសំណួរ​ជាច្រើនកំពុងត្រូវ​បានគេចោទសួរថា តើការជួសជុល​កែលម្អអគារនេះ​ឡើងវិញ អាច​ជា​មូល​ហេតុ​ចូល​រួម​​ចំណែក​បង្ក​ឱ្យ​មាន គ្រោះអគ្គិភ័យ​ដ៏ប្រល័យនេះ ឬក៏យ៉ាងណា  ស្រប​​ពេល​ដែល​ការ​ស៊ើប​អង្កេត​​ បាននិងកំពុងបន្តប្រព្រឹត្តទៅ។

គួរបញ្ជាក់ថា អគារខាងលើនេះ​​មាន​ឈ្មោះថា Grenfell Tower ស្ថិតនៅក្នុងសង្កាត់ North Kensington ភាគខាងលិច​​ទីក្រុងឡុងដ៍ ដែល​ត្រូវ​បាន​គេ​រាយ​ការណ៍​ថា បានទទួល​រងការឆាបឆេះកាលពីវេលាម៉ោង ១៖១៦នាទីយប់ថ្ងៃពុធ (ម៉ោងក្នុងតំបន់) ចាប់តាំងពីជាន់ទីពីរ​រហូតដល់ជាន់លើបំផុត ហើយ​ក្រុម​ពន្លត់​​អគ្គី​ភ័យ​ដល់​ទៅ​ជាង ២០០នាក់ បាន​​ចូលរួមពន្លត់​គ្រោះអគ្គីភ័យដ៏​ធំសម្បើមនេះ។ មនុស្សរហូតដល់ ៦០០នាក់ មានទាំងកុមារ និងជនចាស់ជរា​ត្រូវគេជឿជាក់ថា បានស្ថិតក្នុងលំនៅឋាន​ប្រមាណ ១២០ខ្នង ដែលនៅ​ក្នុងអគារ​កម្ពស់​​​២៤​ជាន់​នោះ នៅពេលដែលអគ្គីភ័យបានកើត​ឡើង៕