(ប៉េកាំង)៖ ប៉ូលិសចិនបានបញ្ជាក់នាថ្ងៃសុក្រនេះថា ហេតុការណ៍ផ្ទុះដ៏ខ្លាំងក្លាមួយ ដែលបានផ្តាច់យកជីវិតមនុស្សសរុបចំនួន០៨នាក់ នៅក្រៅសាលាមត្តេយ្យមួយកន្លែង នៃភាគខាងកើតប្រទេសចិននោះ ត្រូវបានបង្កឡើងដោយគ្រាប់បែកកែច្នៃមួយគ្រាប់ ហើយជនសង្ស័យក៏បានបាត់បង់ជីវិត ទៅជាមួយគ្នាផងដែរ។ នេះបើតាមការចេញផ្សាយដោយសារព័ត៌មាន Channel News Asia នៅរសៀលថ្ងៃសុក្រ ទី១៦ ខែមិថុនា ឆ្នាំ២០១៧។
ប៉ូលិសក្នុងតំបន់កើតហេតុបានឲ្យដឹងថា មានហេតុការណ៍ផ្ទុះដ៏ខ្លាំងក្លាមួយ បានកើតឡើងនៅខាងក្រៅសាលាមត្តេយ្យមួយកន្លែង ស្ថិតក្នុងក្រុង Xuzhou នៃខេត្ត Jiangsu ភាគខាងកើតនៃប្រទេសចិន នាវេលាម៉ោងប្រមាណ ៤៖៥០នាទីល្ងាច ថ្ងៃព្រហស្បតិ៍ម្សិលមិញនេះ (ម៉ោងក្នុងតំបន់)។ យោងតាមតួលេខចុងក្រោយ ហេតុការណ៍ដ៏កក្រើកខាងលើនេះ បានបណ្តាលឲ្យមនុស្ស ៦៥នាក់ ទទួលរងរបួស និងពីរនាក់បានបាត់បង់ជីវិតនៅហ្នឹងកន្លែងកើតហេតុភ្លាមៗតែម្តង ខណៈ០៦នាក់ផ្សេងទៀតបានស្លាប់នៅឯមន្ទីរពេទ្យ។
គួរបញ្ជាក់ថា បើតាមសេចក្តីថ្លែងការណ៍របស់ក្រសួងសន្តិសុខសាធារណៈចិន ជនសង្ស័យគឺជាបុរសវ័យ២២ឆ្នាំម្នាក់ ដែលមានបញ្ហាសុខភាព និងបានជួបលបន្ទប់ស្នាក់នៅ នៅក្បែរកន្លែងកើតហេតុ៕
