(ម៉ាឌ្រីត)៖ ស្របពេលកំពុងជាប់ទណ្ឌកម្មសេដ្ឋកិច្ច ពីសហគមន៍អន្តរជាតិ កូរ៉េខាងជើងបានឆ្លៀតយកពេលវេលាពីការបាញ់មីស៊ីលបង្អួតសហរដ្ឋអាមេរិក មកធ្វើបទបង្ហាញពីការទាក់ទាញភ្ញៀវទេសចរបរទេស ឱ្យទៅកម្សាន្តប្រទេសរបស់ខ្លួន។ ការធ្វើបទបង្ហាញនេះធ្វើឡើងនៅក្នុងពិធីមួយ រៀបចំឡើងក្នុងទីក្រុងម៉ាឌ្រីតប្រទេសអាស្ប៉ាញ នៅថ្ងៃព្រហស្បតិ៍សប្ដាហ៍នេះ ដោយអគ្គរដ្ឋទូតកូរ៉េខាងជើងប្រចាំទីក្រុងម៉ាឌ្រីត និងអង្គការទេសចរណ៍ពិភពលោក (WTO)។ នេះបើតាមការចេញផ្សាយដោយទីភ្នាក់ងារសារព័ត៌មានចិនស៊ិនហួរ នៅព្រឹកថ្ងៃសុក្រ ទី១៦ ខែមិថុនា ឆ្នាំ២០១៧។
ថ្លែងនាឱកាសនោះដែរ អគ្គរដ្ឋទូតកូរ៉េខាងជើង លោក Kim Hyok-Chol បានបញ្ជាក់ថា ប្រទេសរបស់លោកបានត្រៀមខ្លួនរួចហើយ ក្នុងការបើកចំហវិស័យទេសចរណ៍ និងរៀនសូត្រពីវិស័យទេសចរណ៍អេស្ប៉ាញ។ ជាងនេះទៅទៀត បច្ចុប្បន្នទីក្រុងព្យុងយ៉ាងក៏នឹងជួយសម្រួលផងដែរដល់ភ្ញៀវទេសចរ មកពីបណ្ដាប្រទេសលោកខាងលិច តាមរយៈការកាត់បន្ថយពេលវេលារង់ចាំទទួលយកទិដ្ឋាការ និងវិធានការជាច្រើនផ្សេងទៀត។ ដោយឡែកអគ្គលេខាធិការ WTO លោក Taleb Rifai ដែលទើបតែទៅធ្វើទេសចរណ៍នៅកូរ៉េខាងជើងនាពេលថ្មីៗនេះ បានជំរុញឱ្យអ្នកទេសចរណ៍អេស្ប៉ាញ និងអឺរ៉ុបធ្វើដំណើរទៅកាន់កូរ៉េខាងជើង។
លោក Rifai បានលើកឡើងទៀតថា ភ្ញៀវទេសចរអឺរ៉ុបកាន់តែច្រើនធ្វើដំណើរទៅកូរ៉េខាងជើង គឺមានន័យថា វាជារឿងល្អសម្រាប់ប្រជាជនកូរ៉េខាងជើង ក្នុងការស្វែងយល់ពីពិភពលោកខាងក្រៅ ហើយថា វាគឺជារឿងមិនទំនងដែលគេមិនឆ្លើយតបវិជ្ជមាន ចំពោះចេតនារបស់ទីក្រុងព្យុងយ៉ាង ក្នុងការបើកចំហទ្វារទទួលយកភ្ញៀវទេសចរលោកខាងលិច។ «វិស័យទេសចរណ៍នាំមនុស្សឱ្យស្គាល់គ្នាទៅវិញទៅមក... នេះជាការងារ កាតព្វកិច្ច និងទំនួលខុសត្រូវ ដែលយើងត្រូវតែធ្វើនៅគ្រប់ទីកន្លែងទំាងអស់នៅលើពិភពលោក»។ នេះបើតាមលោក Rifai៕
