(ឡុងដ៍)៖ បញ្ហាបច្ចេកទេសផ្នែកព័ត៌មានវិទ្យា ដែលបានបណ្តាលឲ្យអ្នកដំណើររាប់ម៉ឺននាក់របស់ ក្រុមហ៊ុនអាកាសចរណ៍យក្ស British Airways ប្រចាំ​ចក្រភពអង់គ្លេស ខកខានការធ្វើដំណើរអស់រយៈពេលប៉ុន្មានថ្ងៃ កាលពីឧសភាកន្លងទៅថ្មីៗនេះនោះ នឹងធ្វើឲ្យក្រុមហ៊ុនខាតបង់ប្រាក់ប្រមាណ​ជា​៨០លានផោន ដែលស្មើនឹង១០២.១២លានដុល្លារសហរដ្ឋអាមេរិក។ នេះបើតាមការវាយ​តម្លៃរបស់លោក Willie Walsh អតីត​នាយក​ប្រតិបត្តិ​​របស់ British Airways (BA) និងជាអគ្គនាយក​​សម្ព័ន្ធ​​អា​កាស​ចរ​ណ៍អន្តរជាតិ (IAG) ដែលជាម្ចាស់គ្រប់គ្រង BA ដកស្រង់ដោយសារព័ត៌មាន Channel News Asia នៅយប់ថ្ងៃព្រហស្បតិ៍ ទី១៥ ខែមិថុនា ឆ្នាំ២០១៧។

សូមរំលឹកថា អាកាសចរណ៍ Birtish Airways បានជួបប្រទះភាពកកស្ទះចរាចរណ៍ នៃការហោះហើរយ៉ាងធ្ងន់ធ្ងរមួយ នៅឯអាកាសយានដ្ឋាន Heathrow និង Gatwick នៃទីក្រុងឡុងដ៍ នៅពេលដែលកម្លាំងចរន្តអគ្គីភ័យហួសកម្រិត បានបណ្តាលឲ្យប្រព័ន្ធកុំព្យូទ័ររបស់ខ្លួន គាំង​​ដំណើរ ដែល​ជា​ហេតុ​បានបង្ខំឲ្យក្រុមហ៊ុនលុបជើងហោះស្ទើរតែទាំងអស់ចោល កាលពីថ្ងៃទី២៧ ខែឧសភាកន្លងទៅនេះ នៅចំពេលថ្ងៃឈប់សម្រាក​ចុង​សប្តាហ៍​​ថែម​ទៀត៕