(មីយ៉ាន់ម៉ា)៖ កងទ័ពមីយ៉ាន់ម៉ាបានឲ្យដឹង នាថ្ងៃព្រហស្បតិ៍នេះថា យន្តហោះយោធាមួយគ្រឿង ដែលបានធ្លាក់ទៅក្នុងសមុទ្រ Andaman Sean ជាមួយមនុស្ស១២២នាក់ កាលពីសប្តាហ៍មុននោះ ត្រូវបានគេប្រទះឃើញហើយ ដោយផ្នែកកន្ទុយត្រូវបានគេ ប្រទះឃើញ នៅជាប់ជាមួយនឹងសំណាញ់ចាប់ត្រីរបស់កប៉ាល់នេសាទក្នុងស្រុកមួយគ្រឿង នៅក្រោមផ្ទៃសមុទ្រជម្រៅ៣៥ម៉ែត្រ និងស្ថិតនៅចម្ងាយប្រហែល១២គីឡូម៉ែត្រ ភាគខាងលិចទីក្រុង Dawei ក្នុងអំឡុងប្រតិបត្តិការរុករកនិងជួយសង្រ្គោះយ៉ាងសកម្ម ដែលបានឈានចូលមកដល់ថ្ងៃទី០៩ល្មម រីឯចំនួនសរុបនៃសាកសពជនគ្រោះ ដែលត្រូវបានរកឃើញនិងស្រង់ចេញពីផ្ទៃសមុទ្រវិញ គឺកើនដល់៩០នាក់ហើយ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅយប់ថ្ងៃព្រហស្បតិ៍ ទី១៥ ខែមិថុនា ឆ្នាំ២០១៧។
សូមជំរាបថា យន្តហោះធុន Y-8-200F របស់កងទ័ពជើងអាកាសមីយ៉ាន់ម៉ា បានដឹកអ្នកដំណើរ១០៨នាក់ និងសហសេវិក១៤នាក់ ព្រមទាំងមានផ្ទុកទំនិញផ្សេងៗទម្ងន់ ២,៤តោនផងដែរ ហើយក្នុងចំណោមអ្នកដំណើរទាំងនោះមានកុមារ ១៥នាក់, មនុស្សពេញវ័យជាជនស៊ីវិលចំនួន ៥៨នាក់, កងទ័ព ៣៥នាក់ ដែល០៦នាក់ជាមន្ត្រីយោធាជាន់ខ្ពស់ និង ២៩នាក់ជាមន្ត្រីយោធាធម្មតា នៅពេលដែលវាបានដាច់ការទាក់ទងក្នុងអំឡុងពេលហោះចេញពីទីក្រុង Myeik ដើម្បីឆ្ពោះទៅកាន់ទីក្រុង Yangon កាលពីរសៀលថ្ងៃពុធសប្តាហ៍មុន នៅលើផ្ទៃសមុទ្រ Andaman។ រីឯមូលហេតុដែលបានបង្កឲ្យកើតមានសោកនាដកម្មធ្លាក់យន្តហោះដ៏អាក្រក់នេះ ក៏ពុំត្រូវបានបកស្រាយ ឬដឹងច្បាស់នោះដែរ៕
