(ម៉ានីល)៖ អ្នកនយោបាយហ្វីលីពីន លោក Zia Alonto Adiong នៅថ្ងៃព្រហស្បតិ៍នេះបាននិយាយថា ប្រជាជនដែលបានរត់ភៀសខ្លួនគេចចេញពីទីក្រុង Marawi បានឃើញសាកសពមនុស្សរាប់រយនាក់ នៅក្នុងតំបន់ដែលយោធាហ្វីលីពីន និងក្រុមឧទ្ទាមមានសម្ព័ន្ធភាពជាមួយពួក ISIS កំពុងវាយប្រយុទ្ធគ្នាអស់រយៈពេល ជាងបីសប្ដាហ៍មកហើយ។ នេះបើតាមការចេញផ្សាយដោយសារព័ត៌មាន Channel News Asia នៅរសៀលថ្ងៃព្រហស្បតិ៍ ទី១៥ ខែមិថុនា ឆ្នាំ២០១៧។
ថ្លែងទៅកាន់អ្នកសារព័ត៌មាន លោក Zia Alonto Adiong បានលើកឡើងយ៉ាងដូច្នេះថា «ប្រជាជនទីក្រុង Marawi បានប្រាប់ថា ពួកគេបានប្រទះឃើញសាកសពមនុស្សពី៥០០ នាក់ ដល់១០០០នាក់ឯណោះ ដែលនេះគឺផ្ទុយទាំងស្រុងទៅនឹង ការអះអាងរបស់រដ្ឋាភិបាលទីក្រុងម៉ានីលថា មនុស្សតែ២៩០នាក់ ក្នុងនោះមានពួកឧទ្ទាម ២០៦នាក់ យោធា៥៨នាក់ និងជនស៊ីវិល២៦នាក់បានស្លាប់។ តាមរយៈការអះអាងនេះ វាអាចមានន័យថា ក្នុងចំណោមនោះទំនងជាជីវិតស៊ីវិលខ្ទង់រយនាក់ឯណោះ បានបាត់បង់ជីវិត»។
គួរបញ្ជាក់ថា ក្រុមសកម្មប្រយុទ្ធ Maute ដែលមានសម្ព័ន្ធភាពជាមួយក្រុម អាប៊ូសាយយ៉ាហ្វ និងទើបតែភ្ជាប់ទំនាក់ទំនងទៅរក ISIS កាលពីពេលថ្មីៗនេះ បានធ្វើការដណ្តើមកាន់កាប់ទីក្រុង Marawi ស្ថិតនៅលើកោះមីនដាណាវ ភាគខាងត្បូងប្រទេសហ្វីលីពីន ដែលជាហេតុបង្ខំឲ្យកងកម្លាំងរដ្ឋាភិបាល លោក រ៉ូឌ្រីហ្គោ ឌូតឺតេ ចេញប្រតិបត្តិការក្តៅ និងប្តេជ្ញាបោសសម្អាតក្រុមនេះឲ្យអស់ តបតាមច្បាប់អាជ្ញាសឹកដែលបានដាក់ចេញ នៅទូទាំងខេត្តភាគខាងត្បូងនេះចំនួន ៦០ថ្ងៃ គិតចាប់តាំងពីខែចុងខែឧសភាមក៕
