(ម៉ូស្គូ)៖ ទីបំផុតកងកម្លាំងរបស់ក្រុមរដ្ឋអ៊ីស្លាម ISIS បានដណ្តើមកាន់កាប់រូងភ្នំមួយមានឈ្មោះថា Tora Bora ស្ថិតនៅក្នុងខេត្ត Nangarhar របស់ប្រទេសអាហ្វហ្គានីស្ថាន ដែលធ្លាប់ត្រូវបានមេដឹកនាំអាល់កៃដា គឺលោក អូសាម៉ា ប៊ិនឡាដិន ប្រើប្រាស់ជា​មូលដ្ឋានលាក់ខ្លួនដ៏រឹងមាំបំផុត កាលពីដើមទសវត្សរ៍ឆ្នាំ២០០០។ នេះបើតាមការ​ចេញ​ផ្សាយដោយបណ្តាញព័ត៌មាន​រុស្ស៊ី RT នារសៀលថ្ងៃព្រហស្បតិ៍ ទី១៥ ខែមិថុនា ឆ្នាំ២០១៧។

តាមមន្ត្រីក្នុងខេត្ត Nangarhar បានប្រាប់បណ្តាញព័ត៌មាន AP ថា «ក្រុម ISIS បានចាប់ផ្តើមវាយសង្គ្រប់យក​តំបន់ Tora Bora តាំងពីយប់ថ្ងៃអង្គារសប្តាហ៍នេះមកម្ល៉េះ ហើយទីបំផុតបណ្តាញភេរវករនេះ បានក្រសោប​យកតំបន់ភ្នំជុំវិញនោះអស់ហើយ»។ បន្ថែមពីនេះ មន្ត្រីរដ្ឋាភិបាល​អាហ្វហ្គានីស្ថានក៏​បានអះអាងផងដែរថា ក្រុមសកម្មប្រយុទ្ធ​តាលីបង់ ១២នាក់ បានស្លាប់​នៅក្នុងការប្រយុទ្ធ​ជាមួយក្រុម ISIS ខណៈកងកម្លាំងរបស់​ក្រុម​រដ្ឋអ៊ីស្លាមនេះ មានចំនួនរាប់រយនាក់​ឯណោះ ដែលបាន​ចូលរួមប្រតិបត្តិការ​វាយសង្គ្រប់យកតំបន់ Tora Bora។

គួរបញ្ជាក់ថា ភ្លាមៗក្រោយពីការក្រសោបយករូងភ្នំខាងលើនេះ ISIS បានធ្វើការដាក់ពង្រាយ​កាំភ្លើងធំ និងកង​កម្លាំងនៅចំណុចសំខាន់ៗ ជុំវិញអតីតមូលដ្ឋានលាក់ខ្លួនដ៏រឹងមាំរបស់ អូសាម៉ា ប៊ិនឡាដិន មួយនេះ។ មន្ត្រី​អាហ្វហ្គានីស្ថានបានលើកឡើងថា ជោគជ័យរបស់ ISIS នាពេលនេះ គឺជាការបោះជំហានដ៏ធំមួយសម្រាប់ក្រុម​នេះ ក្នុងការប្រយុទ្ធប្រឆាំងនឹងគូសត្រូវ នោះគឺក្រុមតាលីបង់ ព្រមទាំងការពង្រីកដែនដីរបស់ខ្លួន ខណៈនៅប្រទេស​អ៊ីរ៉ាក់ ISIS កំពុងតែថមថយឥទ្ធិពលបន្តិចម្តងៗ៕