(ម៉ានីល)៖ ប៉ូលិសហ្វីលីពីន​នៅថ្ងៃព្រហស្បតិ៍នេះ បានចាប់ខ្លួនបុរសម្នាក់​ដែលគេសង្ស័យថា ជាសមាជិក និងជាអ្នកផលិតគ្រាប់បែក​ឱ្យក្រុមឧទ្ទាម មានសម្ព័ន្ធភាពជាមួយក្រុម ISIS នៅភាគខាងត្បូង​នៃប្រទេស។ នេះបើតាមរបាយការណ៍​របស់ប៉ូលិសហ្វីលពីន ដកស្រង់ដោយទីភ្នាក់ងារ​សារព័ត៌មានចិនស៊ិនហួរ នៅព្រឹកថ្ងៃព្រហស្បតិ៍ ទី១៥ ខែមិថុនា ឆ្នាំ២០១៧។

យោងតាម​របាយការណ៍ខាងលើ ជនសង្ស័យមាន​ឈ្មោះថា Mohammad Noaim Maute ត្រូវបានចាប់ខ្លួន នៅម៉ោង​ប្រមាណជា ៧៖០០នាទីព្រឹក នៅឯ​តំបន់ Sta. Cruz Macasadnig នៃទីក្រុង Cagayan de Oro ស្ថិតនៅភាគខាងត្បូង​ប្រទេសហ្វីលីពីន ពោលគឺស្ថិតមិនឆ្ងាយប៉ុន្មាន​ឡើយពីទីក្រុង Marawi ដែលជាសមរភូមិប្រយុទ្ធ​រវាងយោធា​ហ្វីលីពីន និងពួកឧទ្ទាមចាប់​តាំងពីថ្ងៃទី២៣ ខែឧសភាមក។

បន្ថែមពីលើនេះ របាយការណ៍ដដែល​ក៏បានបញ្ជាក់ដែរថា Maute ដែលប្រើឈ្មោះ​មួយទៀត Abu Jadid គឺជាអ្នករស់​នៅក្នុងតំបន់ Poblacion Butig នៃខេត្ត Lanao del Sur ហើយមិនតែ​ប៉ុណ្ណោះ ជនរូបនេះថែម​ទំាងប្រើអត្តសញ្ញា​ណក្លែងក្លាយ ជាសិស្សមកពី Mindanao State University ថែមទៀតផង។

គួរបញ្ជាក់ថា គិតចាប់តាំងពី​ថ្ងៃទី២៣ ខែឧសភា សង្រ្គាមប្រយុទ្ធប្រឆាំង​នឹងពួកភេរវករ របស់លោកប្រធានាធិបតី រ៉ូឌ្រីហ្គោ ឌូតឺតេ បានបណ្ដាល​ឱ្យមនុស្សជិត ៣០០នាក់ហើយ​បាត់បង់ជីវិត ក្នុងនោះរួមមាន​យោធា-ប៉ូលិសហ្វីលីពីនសរុបខ្ទង់ ៦០នាក់, ជនស៊ីវិលរាប់សិបនាក់ និងក្រុមឧទ្ទាមជិត ២០០នាក់៕