(វ៉ាស៊ីនតោន)៖ ក្រុមអ្នកតំណាងរាស្ត្រមកពីគណបក្សប្រជាធិបតេយ្យ ច្រើនជាង១៩០នាក់ បានដាក់ពាក្យប្ដឹង លោក ដូណាល់ ត្រាំ ទៅកាន់តុលាការសហព័ន្ធនៅថ្ងៃពុធនេះ ក្រោមបទចោទប្រកាន់ថា ប្រធានាធិបតីអាមេរិកដ៏ចម្រូងចម្រាសរូបនេះ បានទទួលមូលនិធិពីរដ្ឋាភិបាលបរទេស តាមរយៈសកម្មភាពអាជីវកម្មរបស់លោក ដោយគ្មានការអនុញ្ញាតពីសភាអាមេរិក ហើយដែលនេះគឺជាទង្វើផ្ទុយទៅនឹង រដ្ឋធម្មនុញ្ញអាមេរិក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅរសៀលថ្ងៃពុធ ទី១៤ ខែមិថុនា ឆ្នាំ២០១៧។
យោងតាមភាគីដើមបណ្ដឹង លោក ដូណាល់ ត្រាំ មិនបានស្នើសុំការអនុញ្ញាតពីសភាអាមេរិកឡើយ ក្នុងការទទួលមូលនិធិពីរដ្ឋាភិបាលបរទេស និងការចំណាយប្រាក់ទៅលើក្រុមហ៊ុនរាប់រយរបស់លោក គិតចាប់តាំងពីបានចូលកាន់តំណែងជាប្រធានាធិបតីអាមេរិក កាលពីខែមករាមក បើទោះជារដ្ឋធម្មនុញ្ញាតម្រូវឱ្យលោកស្នើសុំការយល់ព្រម ពីសភាជាមុនក៏ដោយ។ ទោះបីជាយ៉ាងណាក៏ដោយខាងសេតវិមានមិនទាន់ធ្វើការអត្ថាធិប្បាយអ្វីនៅឡើយទេ ប៉ុន្តែបានបញ្ជាក់ថា អាជីវកម្មរបស់លោក ត្រាំ មិនបានរំលោភលើរដ្ឋធម្មនុញ្ញនោះទេ ខណៈការប្ដឹងប្រធានាធិបតីអាមេរិក គឺកម្រនឹងកើតឡើងណាស់នៅក្នុងប្រវត្តិសាស្ត្រអាមេរិក។
គួរបញ្ជាក់ថា ព្រឹទ្ធសមាជិក ៣០រូប និងសមាជិកសភាអាមេរិក ១៦៦រូប នៃគណបក្សប្រជាធិបតេយ្យ បានដាក់ពាក្យប្ដឹងលោក ដូណាល់ ត្រាំ ដោយផ្អែកលើរដ្ឋធម្មនុញ្ញអាមេរិក ដែលចែងថា មន្ត្រីរាជការសាធារណៈអាមេរិក មិនអាចទទួលយកមូលនិធិ ឬក៏អំណោយណាមួយពីរដ្ឋាភិបាលបរទេសឡើត បើគ្មានការអនុញ្ញាតពីសភាពអាមេរិក៕
