(ឡុងដ៍)៖ ឈានមកដល់ម៉ោង ៤៖០០នាទីទៀបភ្លឺថ្ងៃពុធ (ម៉ោងនៅទីក្រុងឡុងដ៍) ប៉ូលិស និងក្រុមពន្លត់អគ្គីភ័យ​នៅតែបន្តប្រតិបត្តិការសង្គ្រោះ និងជម្លៀសមនុស្សម្នាចេញពីតំបន់អគារកម្ពស់ ២៤ជាន់ កំពុងឆាបឆេះស្ថិតនៅ​ភាគខាងលិចទីក្រុងឡុងដ៍ ខណៈសាក្សីនៅកន្លែងកើតហេតុបានអះអាងថា បានប្រទះឃើញ​ភ្លើងពិលដែលអាចមនុស្សនៅលើ​កំពូល​​អគារដែលកំពុងឆាបឆេះ បានគ្រវីសញ្ញាសុំជំនួយ ប៉ុន្តែក្នុងស្ថាន​ភាពបែបនេះ ក្រុមសង្គ្រោះពិតជាពិបាកណាស់​​នឹង​ធ្វើការ​ជួយសង្គ្រោះនរណាម្នាក់ ចេញពីអគារដែល​ឆេះ​ទាំងស្រុងទៅហើយនោះ។ នេះបើតាមការ​ចេញ​ផ្សាយដោយ BBC នាព្រឹកថ្ងៃពុធ ទី១៤ ខែមិថុនា ឆ្នាំ២០១៧។

អគារខាងលើនេះមានឈ្មោះថា Grenfell Tower ស្ថិតនៅក្នុងសង្កាត់ North Kensington ភាគខាងលិច​ទីក្រុងឡុងដ៍ ដែលត្រូវបានគេរាយការណ៍ថា បានឆាបឆេះនៅវេលាម៉ោង ១៖១៦នាទីយប់ (ម៉ោងក្នុងតំបន់)។ ក្រុមពន្លត់អគ្គីភ័យមានគ្នា ២៤០នាក់ កំពុងស្ថិតនៅកន្លែងកើតហេតុ ដោយប្រជាជន​នៅអគារក្បែរ​ខាងអគារកើតហេតុ​ត្រូវបានជម្លៀសចេញ ព្រោះអ្នក​ជំនាញបាន​ព្រមានថា អគារកម្ពស់២៧ជាន់ដែលកំពុងនេះ នឹងអាចរលំក្នុងពេលឆាប់ៗ។

សាក្សីនៅហ្នឹងកន្លែងកើតហេតុបានឲ្យដឹងទៀតថា «អគារនោះវាឆាបឆេះដល់ស្នូលទៅហើយ វាពិតជាអាក្រក់​ខ្លាំងណាស់។ មនុស្សមួយចំនួនទំនង​ជាស្ថិតនៅក្នុងលំនៅឋានពួកគេនៅឡើយ»។ គួរបញ្ជាក់ថា រហូតមកទល់នឹងពេលនេះ មិនទាន់មានសេចក្តីរាយការណ៍​ណាមួយ បញ្ជាក់អំពីចំនួនមនុស្ស​រងរបួស ឬស្លាប់នោះឡើយ ហើយក៏មិនទាន់​មានការអះអាងថា វាអាចជាអំពើភេរវកម្មនោះដែរ៕