(ដាកា)៖ ចំនួនមនុស្សស្លាប់ ដែលបង្កឡើងដោយភ្លៀងធ្លាក់យ៉ាងដំណំ និងការបាក់ដីនៅភាគអាគ្នេយ៍ប្រទេស​បង់ក្លាដែស បានកើនដល់ ១២៥នាក់ហើយ ដែលវាជាចំនួនដ៏ច្រើនខ្លាំងណាស់ បើប្រៀបធៀបនឹងកាលពីថ្ងៃអង្គារ​ម្សិលមិញ ដែលអាជ្ញាធរបង់ក្លាដែសបានរាយការន៍ថា មនុស្ស ៤៥នាក់បានបាត់បង់ជីវិត។ នេះបើតាម​ការចេញផ្សាយ​ដោយទីភ្នាក់ងារព័ត៌មានចិនស៊ិនហួរ នាព្រឹកថ្ងៃពុធ ទី១៤ ខែមិថុនា ឆ្នាំ២០១៧។

យោងតាមមន្ត្រី​បង់ក្លាដែស​ម្នាក់នៃស្រុក Chittagong ដោយសារតែ​ទទួលរងសម្ពាធ​ទាប នៅឯតំបន់ឆ្នេរ Bengal វាបានបង្កឱ្យ​មានភ្លៀងធ្លាក់​យ៉ាងខ្លំាង ព្រមទាំងគ្រោះរអិលបាក់ដី ដែល​បានសម្លាប់មនុស្ស​យ៉ាងហោចណាស់ ១២៥នាក់ (ក្នុងនោះមានកងកម្លាំងសង្គ្រោះជាង ១០នាក់) នៅក្នុងស្រុក​ចំនួន​០៣ មានដូចជា Chittagong, Cox's Bazaar និងស្រុក Bandarban គិតចាប់តាំងពី​ថ្ងៃចន្ទ​ម្សិលមិញមក។ មន្ត្រីរូបនេះ​ដដែល នៅក្នុងលក្ខខណ្ឌ​មិនបញ្ចេញ​អត្តសញ្ញាណ បានបញ្ជាក់ទៀតថា កងកម្លាំងយោធា​ ប៉ូលិស និងភ្នាក់ងារពន្លត់​អគិ្គភ័យនៅព្រឹកថ្ងៃអង្គារនេះ បាន​ចូលរួមក្នុងប្រតិបត្តិការ​ជួយសង្រ្គោះ។

គួរបញ្ជាក់ថា បើតាមអាជ្ញាធរ​ឧតុនិយម​បង់ក្លាដែស កម្ពស់ទឹកនៅតាម​តំបន់ស្ថិតនៅជិតដងទន្លេ ដូច្នេះហើយ​ទើបពួកគេ អំពាវនាវឱ្យប្រជាជន​របស់ខ្លួន​មានការប្រុងប្រយ័ត្តខ្ពស់ ខណៈរដ្ឋធានីដាកា និងស្រុក ​Chittagone ត្រូវបានទឹកជន់លិច។ បន្ថែមពីនេះក្រុមសង្គ្រោះ ១០នាក់ ក៏បានទទួលរងរបួសផងដែរ គិតចាប់តាំងពីគ្រោះ​មហន្តរាយកើតឡើងតាំងពីថ្ងៃចន្ទដើមសប្តាហ៍នេះមក៕