(​ប៊ែរឡាំង)៖ ប្រទេសអាល្លឺម៉ង់ និងអេស្ប៉ាញ​បានត្រៀមខ្លួនរួចរាល់ហើយ ក្នុងការចាប់ផ្ដើម​ប្រមូលធនធានសម្រាប់គំរោងផលិតយន្ដហោះចម្បាំងជំនាន់ថ្មីរបស់អឺរ៉ុប ខណៈ យន្ដចម្បាំងជំនាន់ក្រោយនេះ​ត្រូវបានគេរំពឹងថា អាចនឹងត្រូវផលិតចេញពី​ទីក្រុង ​Toulouse ដែលជាមូលដ្ឋាន​របស់ក្រុមហ៊ុនផលិត​យន្ដហោះអឺរ៉ុប ​Airbus។ នេះបើតាមការ​ចេញផ្សាយ​ដោយសារព័ត៌មាន Sputnik នៅរសៀលថ្ងៃអង្គារ ទី១៣ ខែមិថុនា ឆ្នាំ២០១៧។

យោងតាមសារព័ត៌មាន​អាល្លឺម៉ង់ Handlesblatt បច្ចុប្បន្ន​វិស័យទ័ពអាកាសអឺរ៉ុប គឺអាស្រ័យតែ​ទៅលើ F-16 Eurofighter, Typhoon, Tornado ក៏ប៉ុន្តែ​វានៅតែមិនទាន់អាចប្រកួតប្រជែង ​ជាមួយយន្ដហោះចម្បាំង​អាមេរិកធុន F-35 ដែលមាននៅបណ្ដា​ប្រទេសអឺរ៉ុបមួយ​ចំនួនដូចជា ដាណឺម៉ាក អ៊ីតាលី ហូឡង់ ណ័រវ៉េ អង់គ្លេស និងតួកគី បានឡើយ។ ប៉ុន្តែយ៉ាងណាក៏ដោយ​គិតចាប់តាំងពី លោក ដូណាល់ ត្រាំ ឡើងកាន់តំណែង​ជា​ប្រធានាធិបតី​អាមេរិកមក មហាអំណាច​អឺរ៉ុប​ដូចជា អាល្លឺម៉ង់ និងបារាំងជាដើម បានចាប់ផ្ដើម​លើកឡើងពី​បំណងចង់ឱ្យអឺរ៉ុបទាំងមូល មានយោធាដោយខ្លួនឯង មិនចាំបាច់ពឹងផ្អែក​ទាំងស្រុងតែ​ទៅលើ​សហរដ្ឋអាមេរិក។

ដោយឡែកជុំវិញ គំរោងផលិតយន្ដហោះ​ជំនាន់ថ្មីរបស់អឺរ៉ុបនេះដែរ ប្រធានផ្នែក​គ្រប់គ្រងការផលិត​យន្ដហោះចម្បាំង របស់ Air​bus លោក Fernando Alonso បានបញ្ជាក់ថា លោកសង្ឃឹមថា បណ្ដាប្រទេស​អឺរ៉ុបផ្សេងទៀត អាចនឹងចូលរួម​ចំណែកនៅក្នុងគំនិត​ផ្ដួចផ្ដើម​ ផលិតយន្ដហោះចម្បាំងអឺរ៉ុប​ជំនាន់ថ្មីនេះ»។

គួរបញ្ជាក់ថា បើតាមសារព័ត៌មាន​អាល្លឺម៉ង់ Handlesblatt ដើម្បីផ្ដល់មូល​និធិអភិវឌ្ឍន៍យន្ដហោះចម្បាំង​ផលិត​ដោយ Air​bus ​កងកម្លាំងទ័ពអាកាស​អាល្លឺម៉ង់ Luftwaffe បាន​ដាក់សំណើទៅកាន់មន្ទីរបញ្ចកោណ​ ឱ្យបញ្ជាក់ពីតម្លៃ​យន្ដហោះចម្បាំង F-35 ស្របពេលក្រសួង​ការពារជាតិ​អាល្លឺម៉ង់បានបង្ហាញ​ពីបំណង​ ចង់វាយតម្លៃលើ​យន្ដហោះចម្បាំង នៅលើទីផ្សារ​ឡើងវិញ ក្នុងនោះរួមមាន​ទាំង F-35 ផងដែរ៕