(វ៉ាស៊ីនតោន)៖ សហរដ្ឋអាមេរិក​បានចេញមុខថ្កោលទោសយ៉ាងខ្លាំង​ ចំពោះការបង្រ្កាប​របស់អាជ្ញាធររុស្ស៊ី​ទៅលើក្រុមបាតុករ​​ប្រឆាំងនឹងអំពើពុករលួយ​កាលពី​ថ្ងៃចន្ទ និងអំពាវនាវឱ្យទីក្រុងម៉ូស្គូ ដោះលែងអ្នតតវ៉ា​ដោយសន្តិវិធី​ ដែលត្រូវបានឃុំខ្លួន​នៅទូទាំងប្រទេស។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១៣ ខែមិថុនា ឆ្នាំ២០១៧។

ថ្លែងនៅក្នុងសន្និសីទសារព័ត៌មាន អ្នកនាំពាក្យសេតវិមាន លោក សន ស្ពៃសឺ (Sean Spicer) បានបញ្ជាក់យ៉ាងដូច្នេះថា «សហរដ្ឋអាមេរិក​ថ្កោលទោសយ៉ាង​ពេញទំហឹង ចំពោះការ ឃុំខ្លួនក្រុម​បាតុករតវ៉ា​ដោយសន្តិវិធី​រាប់រយនាក់ នៅទូទាំង​ប្រទេសរុស្ស៊ី... ហើយការឃុំខ្លួន​អ្នកតវ៉ា​ដោយសន្តិវិធី សកម្មជន​សិទ្ធិមនុស្ស និងអ្នកសារព័ត៌មាន​គឺជាការប្រឆាំងនឹង​តម្លៃនៃ​លិទ្ធិប្រជាធិបតេយ្យ»។

គួរបញ្ជាក់ថា មុននឹងបាតុកម្មតវ៉ាផ្ទុះឡើង​នៅក្នុងទីក្រុងម៉ូស្គូ អាជ្ញាធររុស្ស៊ីបានចាប់ខ្លួន​មេដឹកបក្សប្រឆាំង លោក Alexei Navalny ជាលើកទី០២ រីឯតុលាការបានសម្រេចចិត្តផ្តន្ទាទោសរូបលោក ឱ្យជាប់ពន្ធនាគារ​រយៈពេល ៣០ថ្ងៃ ពីបទប្រមូលផ្ដុំបាតុកម្មតវ៉ា​ដោយខុសច្បាប់។ មួយវិញទៀត​បើតាមអង្គការ​សង្គមស៊ីវិល មនុស្ស ៨២៥នាក់ ត្រូវបានឃាត់ និងឃុំខ្លួន​បណ្ដោះអាសន្ន ខណៈខាង​អាជ្ញាធរអះអាងថា មនុស្សតែ ៥០០នាក់ប៉ុណ្ណោះ​ត្រូវបាន​ចាប់ខ្លួន ហើយក្រុម​បាតុករ ៥,០០០នាក់ បានចូលរួមនៅ​ក្នុង​បាតុកម្មតវ៉ាកាលពី​ថ្ងៃចន្ទ៕