(រីយ៉ាត)៖ អាជ្ញាធរអារ៉ាប៊ីសាអូឌីត បានទាត់ចោលពាក្យចចាមអារាមដែលអះអាងថា ទីក្រុងរីយ៉ាដបានហាមមិនឱ្យប្រជាជនកាតា ចូលមកក្នុងវិហារអ៊ីស្លាម Grand Mosque ឬ Masjid al-Haram នៅក្នុងទីក្រុងមិចកា (Mecca) ដើម្បីបំពេញកាតព្វកិច្ចធ្វើធម្មយាត្រាប្រចាំឆ្នាំដ៏ធំរបស់អ្នកកាន់ សាសនាអ៊ីស្លាម ។ នេះបើតាមការចេញផ្សាយដោយសារព័ត៌មាន Al Arabiya នៅរសៀលថ្ងៃចន្ទ ទី១២ ខែមិថុនា ឆ្នាំ២០១៧។
កាលពីថ្ងៃអាទិត្យសារព័ត៌មាន Al Sharq មានមូលដ្ឋាននៅក្នុងទីក្រុងដូហា បានចុះផ្សាយថា គណៈកម្មាការជាតិសិទ្ធិមនុស្សកាតា (NHRC) បានទទួលពាក្យបណ្ដឹងពីប្រជា ជនកាតាមួយចំនួនថា ពួកគេត្រូវបានហាមឃាត់ក្នុងការធ្វើធម្មយាត្រាប្រចាំឆ្នាំ ហាច់ (Haj) ឬក៏ហាជីនៅឯ Masjid al-Haram ក្នុងទីក្រុងមិចកា ប្រទេសអារ៉ាប៊ីសាអូឌីត។ ចំណែកឯប្រធាន NHRC លោក Ali bin Smaikh al-Marri បានថ្កោលទោស និងហៅការហាមឃាត់នេះថា ជាការំលោភយ៉ាងធ្ងន់ធ្ងរលើសិទ្ធិអនុវត្តន៍ការគោរពប្រតិបត្តិសាសនា និងជំនឿដែលការពារដោយអនុសញ្ញាស្ដីពីសិទ្ធិមនុស្ស។
ប៉ុន្តែទោះបីជាយ៉ាងណាក៏ដោយ អាជ្ញាធរអារ៉ាប៊ីសាអូឌីតបានទាត់ចោលការអះអាងនេះ ដោយបញ្ជាក់ទៀតថា គិតចាប់តាំងពីថ្ងៃអាទិត្យសប្ដាហ៍មុនមក ទីក្រុងរីយ៉ាត បានទទួលអ្នកធ្វើធម្មយាត្រាមកពីប្រទេសកាតា ១៦៣៣នាក់ ហើយដែលពួកគេទាំងនេះសុទ្ធតែ បានធ្វើធម្មយាត្រា អ៊ុរ៉ស់ (Umrah) (ឬធម្មយាត្រាត្រៀមមុនធម្មយាត្រាហាច់)។ ជាងនេះទៅទៀត បើតាមសារព័ត៌មាន Al Arabiya កាលពីថ្ងៃសុក្រ អារ៉ាប៊ីសាអូឌីត ក៏បាន អនុញាតឱ្យប្រជាជនកាតា ២០៦នាក់ ឆ្លងព្រំដែន Salwa ដើម្បីធ្វើធម្មយាត្រាអ៊ុរ៉ស់ នៅក្នុងទីក្រុងមិចកាផងដែរ។
គួរបញ្ជាក់ថា ខណៈជម្លោះការទូតជាមួយកាតា មិនទាន់ធូរស្រាលនៅឡើយ អេមីរ៉ាតអារ៉ាប់រួម បានប្រកាសដាក់ទោសទណ្ឌលើប្រជាជនរបស់ខ្លួន ដែលហ៊ានបង្ហោះសារគាំទ្រកាតា នៅលើបណ្ដាញទំនាក់ទំនងសង្គម ហើយជនល្មើសអាចនឹងត្រូវប្រឈមមុខជាប់ពន្ធនាគាររហូតដល់ទៅ ១៥ឆ្នាំ ព្រមទាំងពិន័យជាប្រាក់ ១៣៦,០០០ដុល្លារ ខណៈអាជ្ញាធរបារ៉ែន ក៏បានចេញការអនុវត្តដូចគ្នានេះដែរ ដោយដាក់ទោសជនល្មើស ឱ្យជាប់ពន្ធនាគារយ៉ាងតិច ០៥ឆ្នាំ៕
