(ហ្សាការតា)៖ គ្រោះធម្មជាតិរញ្ជួយដីផែនដីដ៏កក្រើកកម្រិត ៦.៣រ៉ិចទ័រ ដែលបានវាយប្រហារភាគខាងត្បូងខេត្ត​ជ្វានៃប្រទេសឥណ្ឌូណេស៊ីនោះ មិនបានបង្កការខូចខាតទ្រព្យសម្បត្តិ ផ្ទះសម្បែង ឬក៏មនុស្សរងគ្រោះថ្នាក់នោះ​ឡើយ ដោយវាគ្រាន់តែបង្កភាពភ័យតក់ស្លុតដល់ប្រជាជនរស់នៅក្នុងតំបន់នោះ ក៏ព្រោះតែអគារជាច្រើនបានញ័រ​រញ្ជួយ​ពីតិច ទៅមធ្យមប៉ុណ្ណោះ។ នេះបើតាមការចេញផ្សាយនៅមុននេះបន្តិច ដោយទីភ្នាក់ងារព័ត៌មានចិនស៊ិនហួរ នាព្រឹកថ្ងៃចន្ទ ទី១២ ខែមិថុនា ឆ្នាំ២០១៧។

គ្រោះរញ្ជួយដីខាងលើនេះ បានកើតមានឡើងនៅវេលាម៉ោង ៦៖១៥នាទីព្រឹក ម៉ោងនៅទីក្រុងហ្សាការតា ដែលមានចម្ងាយ ១៧៩គីឡូម៉ែត្រពីទីក្រុង Sukabumi នៃខេត្តជ្វា ដោយវាបានញ័រចេញពីក្នុងជម្រៅ ១០គីឡូម៉ែត្រ​ខាងក្រោមបាតសមុទ្រ។ ទីភ្នាក់ងារគ្រប់គ្រងគ្រោះអាសន្នឥណ្ឌូណេស៊ី (BNPB) បានអះអាងថា គ្រោះរញ្ជួយដី ៦.៣រ៉ិចទ័រនេះ ក៏បានជះឥទ្ធិពលដល់រដ្ឋធានីហ្សាការតាផងដែរ ដែលមានចម្ងាយ ២០០គីឡូម៉ែត្រ ភាគខាងជើងនៃតំបន់ស្នូល ដែលបានរងគ្រោះរញ្ជួយដី។

គួរបញ្ជាក់ថា ប្រទេសឥណ្ឌូណេស៊ី មានទីតាំងស្ថិតនៅក្នុងតំបន់ «Ring of Fire» ដែលជាខ្សែក្រវាត់ដ៏រង្គោះរង្គើ​ព័ទ្ធជុំវិញមហាសមុទ្រប៉ាស៊ីហ្វិក។ ប្រការនេះវាតែងតែបង្កឲ្យប្រទេសនេះ ងាយរងគ្រោះដោយសាររញ្ជួយដី បន្ទុះភ្នំភ្លើង និងព្យុះកំណាចជាដើម៕