(ឡុងដ៍)៖ មេដឹកនំាគណបក្សប្រឆាំងធំបំផុតអង់គ្លេស គឺគណបក្សពលករ លោក Jeremy Corbyn បាននិយាយថា លោកសង្ឃឹមនឹងអាចមានការរៀបចំបោះឆ្នោតថ្មីមួយទៀត នៅក្នុងឆ្នាំ២០១៧នេះ ឬក៏នៅឆ្នាំ២០១៨ខាងមុខ បន្ទាប់ពីលទ្ធផលបោះឆ្នោត កាលពីថ្ងៃព្រហស្បតិ៍សប្ដាហ៍មុនបង្ហាញថា ពុំមានអ្នកណាឈ្នះឲ្យពិតប្រាកដ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅព្រឹកថ្ងៃចន្ទ ទី១២ ខែមិថុនា ឆ្នាំ២០១៧។
ការថ្លែងបែបនេះរបស់ លោក Jeremy Corbyn ធ្វើឡើងនៅក្នុងបទសម្ភាសន៍ជាមួយសារព័ត៌មាន BBC។ លោក Jeremy Corbyn បានបញ្ជាក់យ៉ាងដូច្នេះថា «វាអាចទៅរួចថា នឹងមានការបោះឆ្នោតថ្មីមួយនៅក្នុងឆ្នាំនេះ ឬក៏នៅដើមឆ្នាំក្រោយ ហើយវាអាចជារឿងមួយដ៏ល្អ ពីព្រោះយើងមិនអាចបន្តឱ្យស្ថានភាពអស្ថេរភាពដ៏ខ្លាំងកើតឡើងនោះទេ... យើងមានគំរោង យើងមានការគាំទ្រ ហើយយើងបានត្រៀមខ្លួនរួចជាស្រេច ក្នុងការតស៊ូធ្វើយុទ្ធនាការឃោសនាបោះឆ្នោតជាថ្មី ក្នុងពេលឆាប់ៗនេះតាមដែលអាចធ្វើទៅបាន»។
គួរបញ្ជាក់ថា នៅក្នុងការបោះឆ្នោតសភាកាលពីថ្ងៃព្រហស្បតិ៍សប្ដាហ៍មុន គណបក្សអភិរក្សនិយមរបស់នាយករដ្ឋមន្ត្រីអង់គ្លេស លោកស្រី Theresa May គឺជាអ្នកទទួលបានជ័យជម្នះ ដោយទទួលបានសំឡេងគាំទ្រ ៣១៨អសនៈ ទល់នឹង ២៦២អសនៈ នៃគណបក្សពលកររបស់ លោក Jeremy Corbyn។ ក៏ប៉ុន្តែគណបក្សអភិរក្សនិយម បានបាត់បង់សំឡេងភាគច្រើនដាច់ខាតរបស់ខ្លួន ដែលត្រូវការជាចាំបាច់ ៣២៦សំឡេង ក្នុងចំណោមអសនៈសរុប ៦៥០ក្នុងសភា៕
