(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានចេញមុខ​បដិសេធថា រូបលោកពុំបាន​ប្រាប់ទៅកាន់ អតីត​នាយកការិយា​ល័យ​​ស៊ើបអង្កេតសហព័ន្ធ (FBI) លោក James Comey ឲ្យបោះបង់ការ​ស៊ើបអង្កេតទៅ​លើ​ អតីតទីប្រឹក្សាសន្តិសុខជាតិ លោក Michael Flynn នោះ​ឡើយ ហើយបានបន្ថែមថា លោក ស្វាគមន៍ជានិច្ច​ក្នុងការចូលផ្តល់​សក្ខីកម្ម​ ស្តីពីព្រឹត្តិការណ៍​នៃការសន្ទនា​រវាងរូបលោក និងលោក Comey។ នេះបើតាមការ​ចេញផ្សាយ​ដោយ​ទីភ្នាក់ងារព័ត៌មាន Reuters នៅរសៀល​ថ្ងៃសៅរ៍ ទី១០ ខែមិថុនា ឆ្នាំ២០១៧។

បន្ទាប់ពីត្រូវ​បានក្រុមអ្នកសារព័ត៌មាន​ចោទសួរ​នៅឯសេតវិមាន ស្តីពីសម្តីអះអាងរបស់ លោក James Comey ទាក់ទិននឹងការស៊ើបអង្កេត​​ទៅ​លើ ​លោក Michael Flynn លោក ដូណាល់ ត្រាំ បានថ្លែងថា «ខ្ញុំមិនបាននិយាយ​ដូច្នោះឡើយ» ហើយលោក​ប្រធានាធិបតីអាមេរិក​បាន​បញ្ជាក់ថា រូបលោក ស្វាគមន៍មួយ​រយភាគរយ ក្នុងការផ្តល់សក្ខីកម្ម​ពាក់ព័ន្ធនឹង​ព្រឹត្តិការណ៍ នៃកិច្ចសន្ទនា​មួយទល់នឹងមួយ រវាងរូបលោក និងលោក Comey នៅក្រោម​ពាក្យសម្បថ។

គួរបញ្ជាក់ថា អតីតមេ FBI លោក James Comey ដែលត្រូវបាន​លោក ត្រាំ បញ្ឈប់ពីតំណែង​កាលពី​ខែឧសភា​កន្លងទៅ ក្រោមហេតុផលថា​ លោកពុំមានសមត្ថភាពដឹកនាំ​ទីភ្នាក់ងារ FBI នោះ បានចូលផ្តល់​សក្ខីកម្មក្រោយពាក្យ​សម្បថ នៅចំពោះមុខគណៈកម្មាធិការ​ស៊ើបអង្កេតព្រឹទ្ធ​សភា​កាលពីថ្ងៃព្រហស្បតិ៍​សប្តាហ៍នេះ ហើយអំឡុងពេល​នៃការធ្វើសក្ខីកម្មនោះ មានអ្នកទស្សនាដល់ទៅប្រមាណ ២០លាននាក់​ឯណោះ តាមប្រព័ន្ធផ្សព្វផ្សាយនានារបស់អាមេរិក៕