(សេអ៊ូល)៖ ការអភិវឌ្ឍដ៏ឆាប់រហ័សនៃគ្រាប់មីស៊ីល និងអាវុធនុយក្លេអ៊ែររបស់កូរ៉េខាងជើង មិនមែនជារឿង​សម្ងាត់ទៀតនោះឡើយ ដោយពិភពលោកបានមើលឃើញយ៉ាងច្បាស់ និងទទួលស្គាល់ផងដែរ (ទទួលស្គាល់ថា ជាការគំរាមកំហែងកាន់តែធ្ងន់ធ្ងរ ដល់សន្តិសុខក្នុងតំបន់) ប៉ុន្តែសម្រាប់​សមត្ថភាព​ផលិតយន្តហោះដ្រូន​​ស៊ើបការណ៍វិញនោះ ទីក្រុងព្យុងយ៉ាង​ហាក់មិនសូវ​អួតអាង ឬក៏ប្រើប្រាស់​ប្រកប​ដោយប្រសិទ្ធភាព​​នោះឡើយ ដូចអ្វីដែលបានកើតឡើង​នាពេលនេះ។ នេះបើតាមការចេញ​ផ្សាយដោយសារព័ត៌មាន Sputnik នាព្រឹក​ថ្ងៃសៅរ៍ ទី១០ ខែមិថុនា ឆ្នាំ២០១៧។

នៅក្នុងសប្តាហ៍នេះ កងទ័ពកូរ៉េខាងត្បូងបានប្រទះ​ឃើញយន្តហោះដ្រូនមួយ ធ្លាក់កល់នឹងគល់ឈើក្នុងព្រៃ​ក្បែរព្រំដែនជាមួយ​កូរ៉េខាងជើង ដោយគេអាចសន្និដ្ឋាន​បានភ្លាមៗថា វាជាយន្តហោះស៊ើបការណ៍​សម្ងាត់​របស់ប្រទេស​កូរ៉េខាងជើង។ ដ្រូននេះ​ត្រូវបានប្រទះឃើញនៅក្បែរតំបន់ ដែលមានប្រជាជនកូរ៉េខាងត្បូង​រស់នៅស្ថិតនៅ​ក្នុងខេត្ត Gangwon ជាប់ព្រំដែន​កូរ៉េខាងជើង ប៉ុន្តែសម្រាប់​ព័ត៌មានលម្អិត និងគោលបំណង​នៃការបញ្ជូនដ្រូនប្រភេទនេះ​​មកកូរ៉េខាងត្បូង នៅមិនទាន់មានប្រភព​ដែលអាចបញ្ជាក់ការពិត​នៅឡើយទេ។

គួរបញ្ជាក់ថា យោធាកូរ៉េខាងត្បូងហាក់គ្មានមន្ទិល​សង្ស័យអ្វីឡើយថា យន្តហោះដ្រូននោះ​បានហោះមកពី​កូរ៉េខាជើង ដោយគេបាន​យោងទៅលើរូបភាព និងលក្ខណៈសំខាន់ៗ​មួយចំនួន ដូចដែល​ទីក្រុងព្យុងយ៉ាង​ធ្លាប់យកទៅបង្ហាញ​ក្នុងក្បួនព្យុហយាត្រា​ផងដែរ។ សម្រាប់ដ្រូននេះ​មានប្រវែង ១.៨ម៉ែត្រ និងទំហំព័ទ្ធ​ជុំវិញ ២.៤ម៉ែត្រ ដោយក្រុមជំនាញត្រូវការពេល​យ៉ាងហោចណាស់ ១០ថ្ងៃដើម្បី​វិភាគរកទិន្នន័យ៕