(សេអ៊ូល)៖ មិនខ្វាយខ្វល់រឿង​ទណ្ឌកម្មអ្វីនោះឡើយ ប្រទេសកូរ៉េខាងជើងបានបង្ហាញគោលបំណងធំរបស់​ខ្លួនដដែល នោះគឺការធ្វើតេស្តមីស៊ីលផ្លោងឆ្លងទ្វីប ដែលមានសមត្ថភាពអាចបំពាក់ក្បាលគ្រាប់នុយក្លេអ៊ែរ «ICBM» នៅពេលឆាប់ៗខាងមុខនេះហើយ ដោយសមត្ថភាពរបស់វា ត្រូវបានទីក្រុងព្យុងយ៉ាងអួតជាច្រើន​លើកច្រើនសារថា អាចបាញ់ដល់ដែនដី​សហរដ្ឋអាមេរិកឯណោះ។ នេះបើតាមការ​ចេញផ្សាយដោយ ទីភ្នាក់ងារព័ត៌មាន​យ៉ុនហាប់ នាព្រឹកថ្ងៃសៅរ៍ ទី១០ ខែមិថុនា ឆ្នាំ២០១៧។

យោងតាមកាសែតរដ្ឋរបស់កូរ៉េខាងជើង Rodong Sinmun បានចេញផ្សាយថា «ការធ្វើតេស្តសព្វាវុធ​ជាយុទ្ធសាស្ត្រកាលពីពេលថ្មីៗនេះវាជាការបង្ហាញថា យើងស្ថិតនៅមិនឆ្ងាយនោះឡើយ អំពីការធ្វើតេស្តបាញ់​មីស៊ីលផ្លោងឆ្លងទ្វីប ICBM»។ របបដឹកនាំកូរ៉េខាងជើងត្រូវបានគេមើលឃើញថា មិនបានចាត់ទុកទណ្ឌកម្ម​ពីអន្តរជាតិជាភាពភ័យខ្លាចអ្វីឡើយ ប៉ុន្តែខ្លួននៅតែបង្កើនការអភិវឌ្ឍគ្រាប់មីស៊ីល ស្របទៅតាមការអះអាង​របស់ លោក គីម ជុងអ៊ុន កាលពី​ថ្ងៃទី០១ ខែមករាថា កូរ៉េខាងជើង​កំពុងឈានដល់តំណាក់ចុង​ក្រោយ​នៃការអភិវឌ្ឍ បច្ចេកវិទ្យាផលិត​គ្រាប់មីស៊ីល ICBM ហើយ។

គួរបញ្ជាក់ថា កាលពីថ្ងៃព្រហស្បតិ៍សប្តាហ៍នេះ សហរដ្ឋអាមេរិក កូរ៉េខាងត្បូង និងជប៉ុនបានអះអាងថា ប្រទេសកូរ៉េខាងជើង បានបាញ់មីស៊ីលប្រឆាំងនាវាជាច្រើនគ្រាប់ ធ្លាក់ចូលទៅក្នុងដែនសមុទ្រជប៉ុន ហើយមួយថ្ងៃក្រោយមក កូរ៉េខាងជើងបានចេញមុខទទួលស្គាល់រឿងនេះ។ យោងតាមយោធា​កូរ៉េខាងត្បូង គ្រាប់មីស៊ីលរបស់កូរ៉េខាងជើង ហោះបានចម្ងាយ ២០០គីឡូម៉ែត្រ មុននឹងធ្លាក់ចូលក្នុងដែនសមុទ្រជប៉ុន ហើយវាប្រាកដណាស់ថា ការបាញ់សាកល្បងនេះ ជាការឆ្លើយតបនឹងទណ្ឌកម្មដោយយូអិន ដែលមាន​សម្ព័ន្ធមិត្ត​អាមេរិកនានា ជាអ្នកដុតដៃដុតជើងសម្រេចឲ្យបាន ដើម្បីកៀកសង្កត់ទីក្រុងព្យុងយ៉ាង៕