(ប្រេស៊ីល)៖ ទីបំផុតប្រធានាធិបតីប្រេស៊ីល លោក Michel Temer បានរួចផុតពីគ្រោះអាសន្នមួយគ្រាហើយ ក្រោយពីតុលាការកំពូលប្រេស៊ីល បានសម្រេចដោយសំឡេងចៅក្រមជំទាស់ ៣រូប ទល់នឹងយល់ស្រប ៣រូប ដែលវាមានន័យថា រឿងក្តីនេះត្រូវជាប់គាំងមិនអាចទៅមុខបន្តទៀតបាន ឬក៏អាចមានន័យថា តុលាការមិនទាន់អាចទម្លាក់ លោកTemer ​ចេញពីតំណែង​ក្រោមបទចោទប្រកាន់​រឿងអំពើពុករលួយនោះ​ឡើយ។ នេះបើតាមការ​ចេញផ្សាយដោយ សារព័ត៌មានចិនស៊ិនហួរ នាព្រឹក​ថ្ងៃសៅរ៍ ទី១០ ខែមិថុនា ឆ្នាំ២០១៧។

ការលើកយកបញ្ហាចោទប្រកាន់ លោក Temer ឡើងទៅតុលាការកំពូលនេះ បានកើតមានឡើងបន្ទាប់ពី  ភាពតានតឹង​នៅក្នុងប្រទេស​ប្រេស៊ីល បានកើនឡើង​យ៉ាងក្តៅគគុកក្នុងអំឡុងពេល​ប៉ុន្មានសប្តាហ៍​ចុងក្រោយនេះ បន្ទាប់ពីលេចលឺ​ព័ត៌មានថា តុលាការកំពូល​បានផ្តល់ការ​អនុញ្ញាត ឲ្យមានការស៊ើបអង្កេត​ទៅលើលោក Michel Temer ជុំវិញ​ការសង្ស័យថា លោកបានប្រព្រឹត្ត​អំពើពុករលួយ និងការបង្កឧបសគ្គ​ដល់ប្រព័ន្ធ​យុត្តិធម៌។

បន្ថែមពីនេះកាលពីចុងខែឧសភាកន្លងទៅ មនុស្សប្រមាណ ៣៥,០០០នាក់ បានប្រមូលផ្តុំគ្នា​នៅរដ្ឋធានី Brasilia ដើម្បីបង្ហាញ​​ពីភាពមិនពេញចិត្ត​របស់ពួកគេ ចំពោះមេដឹកនាំបច្ចុប្បន្ន​របស់ប្រេស៊ីល​គឺ លោក Michel Temer ហើយពួកគេ​បានទាមទារ​ឲ្យ ​លោក Temer ចុះចេញពីតំណែង​ជាបន្ទាន់ និងស្នើឲ្យមាន​ការបោះឆ្នោត ជ្រើសរើសប្រធានាធិបតី​នៅមុនពេលកំណត់។ ​

ប្រការនោះបានបង្ខំឲ្យ មន្ត្រីជាច្រើនរូបត្រូវបានជម្លៀសជាបន្ទាន់ ចេញពីអគារក្រសួង និងស្ថាប័នរដ្ឋមួយចំនួន​ ដោយសារតែហ្វូងបាតុករ ធ្វើការវាយប្រហារ និងដុតបំផ្លាញ ខណៈពួកគេកំពុងចូលរួមយុទ្ធនាការក្តៅ ទាមទារឲ្យសភា​ទម្លាក់ប្រធានាធិបតី លោក Michel Temer ចេញពីតំណែង។ ជាការឆ្លើយតប លោក Temer បានចេញបញ្ជាឲ្យ​ដាក់ពង្រាយ​កម្លាំងយោធា ដើម្បីជួយដល់​ប៉ូលិស​ក្នុងការស្តារ​សណ្តាប់ធ្នាប់ក្នុងប្រទេសជាតិ​ឡើងវិញ​ផងដែរ​៕