(ព្យុងយ៉ាង)៖ កូរ៉េខាងជើងបានចេញមុខថ្កោលទោសយ៉ាងខ្លាំង ចំពោះការវាយប្រហារភេរវកម្មចំនួនពីរលើក ផ្ទួនគ្នានៅក្នុងរដ្ឋធានីតេហេរ៉ង់ កាលពីព្រឹកថ្ងៃពុធដែល បណ្ដាលឱ្យមនុស្ស ១៧នាក់ស្លាប់ និង៥២នាក់ផ្សេងទៀតរងរបួស ហើយក្រុមភេរវករ ISIS បានអះអាងថា ជាអ្នកនៅពីក្រោយរឿងនេះ។ នេះបើតាមការចេញផ្សាយដោយទីភ្នាក់ងារសារព័ត៌មានចិន ស៊ិនហួរ នៅព្រឹកថ្ងៃសុក្រ ទី០៩ ខែមិថុនា ឆ្នាំ២០១៧។
នៅក្នុងលិខិតចូលរួមរំលែកទុក្ខ ប្រធានសភាកំពូលកូរ៉េខាងជើង លោក Kim Yong Nam បានសម្ដែងការចូលរួមរំលែកទុក្ខយ៉ាងជ្រាលជ្រៅ ដល់ក្រុមគ្រួសារសាច់ញាតិជនរងគ្រោះ ព្រមទាំងបង្ហាញពីសាមគ្គីភាពជាមួយរដ្ឋាភិបាលអ៊ីរ៉ង់ និងប្រជាជនអ៊ីរ៉ង់ទំាងមូល។ «កូរ៉េខាងជើងថ្កោលទោសយ៉ាងខ្លាំង ចំពោះការវាយប្រហារក្នុងទីក្រុងតេហេរ៉ង់... ហើយសាររំលែកទុក្ខនេះ នឹងជួយពង្រឹងកិច្ចសហប្រតិបត្តិការរវាងប្រទេសទាំងពីរ ក្នុងការប្រយុទ្ធប្រឆាំងនឹង សកម្មភាពភេរវកម្មគ្រប់ទម្រង់»។ នេះបើតាមសាររំលែកទុក្ខ ចេញផ្សាយដោយសារព័ត៌មានកូរ៉េខាងជើង KCNA។
គួរបញ្ជាក់ថា ក្រុម ISIS បានចេញមុខទទួលខុសត្រូវលើ ការវាយប្រហារទំាងពីរលើកនេះ ដែលមិនធ្លាប់មានពីមុនមកទៅលើសភាអ៊ីរ៉ង់ និងផ្នូររបស់ស្ថាបនិកសាធារណរដ្ឋអ៊ីរ៉ង់ លោក Ayatollah Khomeini នៅក្នុងរដ្ឋធានីតេហេរ៉ង់។ ក៏ប៉ុន្តែកងកម្លាំងឆ្មាំការពារជាតិអ៊ីរ៉ង់បែរជាចោទថា អារ៉ាប៊ីសាអូឌីត ជាអ្នកនៅពីក្រោយការវាយប្រហារភេរវកម្មនេះទៅវិញ ខណៈទីក្រុងរីយ៉ាដបានទាត់ចោលការចោទប្រកាន់នេះ មិនតែប៉ុណ្ណោះទីក្រុងតេហេរ៉ង់ ក៏បានទាត់ចោលការចូលរួមរំលែកទុក្ខ របស់ប្រធានាធិបតីអាមេរិកលោក ដូណាល់ ត្រាំ ផងដែរ៕
