(សេអ៊ូល)៖ កូរ៉េខាងជើងបានទទួលស្គាល់ហើយថា ខ្លួនពិតជាបានបាញ់សាកល្បងមីស៊ីលប្រឆាំងនាវាប្រភេទថ្មី ក្រោមការបញ្ជាដោយផ្ទាល់ពីមេដឹកនាំរបស់ខ្លួនគឺ លោក គីម ជុងអ៊ុន ខណៈទីក្រុងព្យុងយ៉ាង កំពុងព្យាយាមសម្រេចឱ្យបានវត្ថុបំណង ផលិតមីស៊ីលផ្លោងឆ្លងទ្វីប ICBM បំពាក់ក្បាលគ្រាប់នុយក្លេអ៊ែរ អាចបាញ់ដល់សហរដ្ឋអាមេរិក។ នេះបើតាមសារព័ត៌មានរដ្ឋកូរ៉េខាងជើង KCNA ដកស្រង់ដោយទីភ្នាក់ងារសារព័ត៌មានយ៉ុនហាប់ នៅព្រឹកថ្ងៃសុក្រ ទី០៩ ខែមិថុនា ឆ្នាំ២០១៧។
យោងតាម KCNA មីស៊ីលដែលកូរ៉េខាងជើងបានធ្វើតេស្ដកាលពីថ្ងៃព្រហស្បតិ៍ គឺជាប្រភេទមីស៊ីលត្រូវបានដាក់តាំងបង្ហាញ នៅអំឡុងព្យុហយាត្រាយោធាកាលពីថ្ងៃទី១៥ ខែមេសា ដើម្បីរំលឹកខួបទី១០៥ នៃអតីតស្ថាបនិកកូរ៉េខាងជើង លោក គីម អ៊ីលស៊ុង។ មីស៊ីលប្រភេទថ្មីនេះ ត្រូវបានបាញ់ចេញពីតំបន់ Wonsan នៃខេត្ត Kangwon តម្រង់ទៅកាន់តំបន់សមុទ្រខាងកើត ហើយមីស៊ីលនេះអាចរត់បានចំងាយ ២០០គីឡូម៉ែត្រ មុននឹងធ្លាក់ក្នុងសមុទ្រជប៉ុន ឬសមុទ្រខាងកើត។
គួរបញ្ជាក់ថា នេះគឺជាលើកទី០៥ហើយ ដែលកូរ៉េខាងជើងធ្វើតេស្ដមីស៊ីល គិតចាប់តាំងពីប្រធានាធិបតីកូរ៉េខាងត្បូងថ្មី លោក មូន ជេអ៊ីន ឡើងកាន់តំណែងមក។ ម្យ៉ាងវិញទៀត ការធ្វើតេស្ដមីស៊ីលនេះទៀតសោត ធ្វើឡើងតែជាងមួយសប្ដាហ៍ប៉ុណ្ណោះ បន្ទាប់ពីក្រុមប្រឹក្សាសន្តិសុខអង្គការសហប្រជាជាតិអនុម័តលើទណ្ឌកម្ម ប្រឆាំងនឹងកូរ៉េខាងជើង សម្រាប់ការបាញ់មីស៊ីលផ្លោង ជាបន្តបន្ទាប់នាពេលថ្មីៗនេះ៕
