(ឡុងដ៍)៖ គណបក្សអភិរក្សនិយម​របស់នាយករដ្ឋមន្ត្រីអង់គ្លេស លោកស្រី Theresa May បានទទួល​ជ័យជម្នះ នៅក្នុងការបោះឆ្នោត​សភាមុនអាណត្តិ​កាលពី​ថ្ងៃព្រហស្បតិ៍ ក៏ប៉ុន្តែបាន​បាត់បង់សំឡេង​ភាគច្រើនដាច់ខាត​របស់ខ្លួន ដែលត្រូវការជា​ចាំបាច់ ៣២៦អសនៈ។ នេះបើតាមលទ្ធផលបឋម​ដកស្រង់ដោយ សារព័ត៌មាន BBC នៅព្រឹកថ្ងៃសុក្រ ទី០៩ ខែមិថុនា ឆ្នាំ២០១៧។

យោងតាមលទ្ធផល ​គណបក្សអភិរក្សនិយមបានទទួលសំឡេង​គាំទ្រ ៣២២អសនៈ តែបើធៀបទៅ​នឹងឆ្នាំ២០១៥ គណបក្សនេះ​ទទួលបានសំឡេងគំាទ្រ ៣៣០អសនៈ ពោលគឺបាន​បាត់បង់សំឡេង​ភាគច្រើន​ដាច់ខាត ច្រើនជាង ១២សំឡេងឯណោះ។ ប៉ុន្តែទន្ទឹមគ្នា លោកស្រី​នាយករដ្ឋមន្ត្រី Therasa May ដែលត្រូវការ​អាណត្តិបន្តតំណែង ដើម្បីស្វែងរក​កិច្ចចរចា​ឱ្យទីក្រុងឡុងដ៍ លែងលះឱ្យដាច់ស្រេច​ជាមួយ​សហភាពអឺរ៉ុប (Brexit) ក៏ទំនងជាបាត់បង់​សំឡេងគាំទ្រ​ភាគច្រើនដាច់ខាតផងដែរ ខណៈគណបក្សពលករ​របស់លោក Jeremy Corbyn បានទទួលសំឡេង​គាំទ្រ ២៦១អសនៈ ឬកើនឡើង ២៧អសនៈ ក្នុងចំណោម​អសនៈសរុប ៦៥០។  

គួរបញ្ជាក់ថា ប្រជាជនអង់គ្លេស ៤៦.៩លាននាក់ បានចុះឈ្មោះ​បោះឆ្នោត​បើធៀបទៅនឹង​កាលពីឆ្នាំ២០១៥ ប្រជាជន ៤៦.៤លាននាក់ បានចុះឈ្មោះបោះឆ្នោត ហើយការបោះឆ្នោតនេះ​ទៀតសោត ពិតជាមានសារៈសំខាន់​ណាស់​សម្រាប់ឱ្យអង់គ្លេស ត្រូវរៀបចំខ្លួន​លែងលះឱ្យដាច់​ស្រេចជាមួយ​សហភាពអឺរ៉ុប ( Brexit) និង ពង្រឹងសន្តិសុខ​បន្ទាប់ពីមានការវាយប្រហារភេរវកម្ម​ ចំនួនបីលើកក្នុងរយៈពេលបីខែមកនេះ៕