(វ៉ាស៊ីនតោន)៖ បន្ទាប់ពីត្រូវបានបញ្ឈប់ពីតំណែងកាលពីខែឧសភា កន្លងទៅអតីតនាយកការិយាល័យស៊ើបអង្កេតសហព័ន្ធ (FBI) របស់​សហរដ្ឋអាមេរិកលោក James Comey នៅទីបំផុត បានចូលផ្តល់សក្ខីកម្មនៅចំពោះមុខ គណៈកម្មាធិការស៊ើបការណ៍សម្ងាត់ព្រឹទ្ធសភា​ ពាក់ព័ន្ធកិច្ចសន្ទនារវាងលោក និងប្រធានាធិបតីលោក ដូណាល់ ត្រាំ ជុំវិញការស៊ើបអង្កេតរបស់ FBI ទៅលើអតីតទីប្រឹក្សាសន្តិសុខជាតិ​លោក Michael Flynn ដែលត្រូវបានគេសង្ស័យថា និងចោទប្រកាន់ថា លួចធ្វើទំនាក់ទំនងជាមួយរដ្ឋាភិបាលរុស្ស៊ី។ នេះបើតាមការចេញ​ផ្សាយដោយសារព័ត៌មាន The Guardian នៅយប់ថ្ងៃព្រហស្បតិ៍ ទី០៨ ខែមិថុនា ឆ្នាំ២០១៧។

គួរបញ្ជាក់ថា កាលពីថ្ងៃទី០៩ ខែឧសភាលោក ដូណាល់ ត្រាំ បានសម្រេចចិត្តបណ្ដេញលោក James Comey ចេញពីតំណែងជា​នាយក FBI ដែលកំពុងដឹកនាំការស៊ើបអង្កេត​ជុំវិញទំនាក់ទំនង​រវាងក្រុមយុទ្ធនាការ​ឃោសនាបោះឆ្នោត​របស់ លោក ត្រាំ និងទីក្រុងម៉ូស្គូ ដោយ​សំអាង​លើ​​ហេតុ​ផលថាលោក Comey គ្មាន​​សមត្ថភាពគ្រប់គ្រាន់ ដើម្បីដឹកនាំទីភ្នាក់ងារ FBI។ ក៏ប៉ុន្តែក្រោយ​ការលេចលឺព័ត៌មានថា លោក ត្រាំ បានស្នើឲ្យលោក Comey បិទបញ្ចប់ការស៊ើបអង្កេតនេះ បានធ្វើឲ្យគេយល់ថា វាអាចជាមូលហេតុមួយ​ដែលលោក ត្រាំ សម្រេចបញ្ចប់​តួនាទីលោក Comey។

យ៉ាងណា​មិញ លោក ត្រាំ មិនបានប្រើប្រាស់​សិទ្ធិអំណាច​ជាប្រធានាធិបតី រារាំងមិនឲ្យអតីតនាយក FBI រូបនេះផ្ដល់សក្ខីកម្ម នៅ​ចំ​ពោះ​មុខ​ព្រឹទ្ធសភាអាមេរិក​នោះទេ តែផ្ទុយទៅវិញ​កាលពី​ថ្ងៃពុធ លោក ត្រាំ បាន​ប្រកាសថានឹងធ្វើការ​តែងតាំង​អតីតអគ្គរដ្ឋអាជ្ញារងអាមេរិក លោក Christopher Wray អាយុ៥០ឆ្នាំ ជានាយក FBI​ ថ្មីជំនួស​លោក Comey៕  ​