(រ៉ង់ហ្គូន)៖ ហេតុការណ៍ដ៏រន្ធត់សម្រាប់ប្រជាជាតិមីយ៉ាន់ម៉ា នោះគឺការធ្លាក់យន្តហោះយោធា ដែលផ្ទុកមនុស្សសរុបចំនួន ១២២នាក់ (ក្នុងនោះ ១០៨នាក់ជាយោធា) កាលពីរសៀលថ្ងៃពុធម្សិលមិញ ហើយរហូតមកដល់ល្ងាចថ្ងៃព្រហស្បតិ៍ ទី០៨ ខែមិថុនា ឆ្នាំ២០១៧នេះ ប្រតិបត្តិការតាមរកមនុស្សបាត់ខ្លួននៅតែបន្ត ដោយកងកម្លាំងយោធាជើងទឹក និងអាកាសរបស់សហភាពមីយ៉ាន់ម៉ា។
ខាងក្រោមនេះជាព្រឹត្តិការណ៍សំខាន់ៗ ដែលបានកើតមានឡើងជាបន្តបន្ទាប់ក្នុងរយៈពេលពីរថ្ងៃមកនេះ៖
* យន្តហោះយោធាមីយ៉ាន់ម៉ា ប្រភេទ Y-8 ដឹកកម្លាំងយោធា និងក្រុមគ្រួសាររបស់ពួកគេ ចេញពីទីក្រុង Myeik នៅវេលាម៉ោង ១៖០៦នាទីរសៀលថ្ងៃពុធ ឆ្ពោះទៅកាន់ទីក្រុង រ៉ង់ហ្គូន ដែលជាទីក្រុងធំមានមនុស្សរស់នៅច្រើនជាងគេ របស់ប្រទេសមីយ៉ាន់ម៉ា ហើយក៏បាត់ដំណឹងតែម្តង នៅពេលវាហោះឡើងដល់រយៈកម្ពស់ ៥.៤គីឡូម៉ែត្រ។
* ក្រោយពីដឹងថា យន្តហោះនោះជួបគ្រោះថ្នាក់ ដោយបានធ្លាក់ទៅក្នុងសមុទ្រ Andaman ភាគខាងត្បូងប្រទេស ប្រតិបត្តិការជួយសង្គ្រោះ យន្តហោះ និងមនុស្សបាត់ខ្លួនត្រូវបានធ្វើឡើង តាំងពីរសៀលថ្ងៃពុធ ហើយរហូតមកទល់នឹងថ្ងៃព្រហស្បតិ៍នេះ មានការចូលរួមពីនាវាយោធា ០៩គ្រឿង, យន្តហោះយោធា ០៥គ្រឿង និងឧទ្ធម្ភាគចក្រ ០២គ្រឿង ដែលសុទ្ធសឹងតែត្រូវបានបញ្ជូនមកពីកងទ័ពអាកាសមីយ៉ាន់ម៉ា។
* នៅព្រឹកថ្ងៃព្រហស្បតិ៍ យោធាមីយ៉ាន់ម៉ាដែលជាក្រុមសង្គ្រោះបានរកឃើញសាកសពបីនាក់ ក្នុងនោះ គឺមានស្ត្រីម្នាក់ ក្មេងតូចម្នាក់ និងបុរសម្នាក់ ហើយបំណែកព្រមទាំងសម្ភារៈលើយន្តហោះមួយចំនួនទៀត ក៏ត្រូវបានស្រង់ចេញពីក្នុងទឹកសមុទ្រផងដែរ។
* គិតត្រឹមល្ងាចថ្ងៃព្រហស្បតិ៍នេះ ក្រុមភ្នាក់ងារជួយសង្រ្គោះបានរកឃើញសាកសពមនុស្សចំនួន ០៧នាក់ទៀតហើយ ក្នុងអំឡុងប្រតិបត្តិការទ្រង់ទ្រាយដ៏ធំមួយ ដើម្បីតាមស្វែងរកយន្តហោះយោធាមីយ៉ាន់ម៉ា ដែលបានបាត់ដំណឹងជាមួយមនុស្សចំនួន ១២២នាក់ រួមមានទាំងពលទាហាន ជនស៊ីវិល និងក្រុមសហសេវិក ហើយវាបានធ្វើឲ្យចំនួនសាកសព ដែលត្រូវបានរកឃើញសរុបកើនដល់ ១០នាក់។
* សាកសពមនុស្សទាំង ១០នាក់ខាងលើ ត្រូវបានគេរកឃើញនៅក្នុងតំបន់មួយ ចម្ងាយប្រមាណ ៣៥គីឡូម៉ែត្រពីក្រុង Launglon ភាគខាងត្បូងនៃប្រទេសមីយ៉ាន់ម៉ា ហើយនៅក្នុងចំណោមនោះ រួមមានមនុស្សពេញវ័យចំនួន០៦នាក់ និងកុមារ០៤នាក់ ខណៈចំនួនកុមារទាំងអស់ដែលមានវត្តមាននៅលើយន្តហោះរងគ្រោះមាន ១៥នាក់។ បន្ថែមពីរនេះកង់របស់យន្តហោះ អាវពោងសុវត្ថិភាព រួមទាំងកាបូបដាក់សម្លៀកបំពាក់មួយចំនួនទៀត ដែលគេជឿជាក់ថា មកពីយន្តហោះធុន Y-8-200F ដែលបានបាត់ដំណឹងនោះ ក៏ត្រូវបានរកឃើញផងដែរ។
* យន្តហោះយោធារបស់កងទ័ពជើងអាកាសមីយ៉ាន់ម៉ា ដែលបានធ្លាក់នៅលើដែនសមុទ្រ Andaman Sea ចម្ងាយប្រហែល ៧០គីឡូម៉ែត្រភាគខាងលិចទីក្រុង Dawei ក្នុងអំឡុងពេលធ្វើដំណើរពីទីក្រុង Myeik ទៅកាន់ទីក្រុងរ៉ង់ហ្គូន នោះគឺជាយន្តហោះដឹកជញ្ជូនខ្នាតមធ្យម ដែលត្រូវបានផលិតឡើងដោយក្រុមហ៊ុន Shaanxi Aircraft Corporation នៃប្រទេសចិន ជាលើកដំបូងកាលពីឆ្នាំ១៩៨០ ដោយផ្អែកទៅលើគំរូយន្តហោះធុន Antonov An-12 របស់អតីតសហភាពសូវៀត។
* យន្តហោះធុន Shaanxi Y-8-200F នេះ អាចផ្ទុកមនុស្សបានច្រើនបំផុតចំនួន ២០០នាក់ ខណៈពេលកើតហេតុវាបានដឹកមនុស្ស ១២២នាក់ រួមមាននាយទាហាន កុមារ និងក្រុមសហសេវិក រួមជាមួយសម្ភារៈផ្សេងៗទៀតទម្ងន់ ២.៤តោន។ រដ្ឋាភិបាលមីយ៉ាន់ម៉ាបានទិញយន្តហោះម៉ាស៊ីនបួននេះ កាលពីខែមិនា ឆ្នាំ២០១៦ ហើយវាមានអាយុកាលហោះហើរ តែរយៈពេល ៨០៩ម៉ោងប៉ុណ្ណោះ ឬស្មើនឹង ៣៤ថ្ងៃ។
គួរបញ្ជាក់ថា ប្រតិបត្តិការជួយសង្គ្រោះនៅតែបន្ត ប៉ុន្តែក្តីសង្ឃឹមអំពីមនុស្សដែលអាចនៅរស់រាននោះ ហាក់ស្រពិចស្រពិលខ្លាំង។ ដោយឡែកមូលហេតុចម្បង ដែលនាំឲ្យយន្តហោះធ្លាក់ គឺមិនទាន់ត្រូវបានបញ្ជាក់នោះឡើយ ប៉ុន្តែខាងយោធាមីយ៉ាន់ម៉ាបានអះអាងថា នៅពេលយន្តហោះហោះឡើង និងបាត់ការទាក់ទងនោះ ស្ថានភាពអាកាសធាតុគឺល្អជាធម្មតា៕
