(រ៉ង់ហ្គូន)៖ យោធាមីយ៉ាន់ម៉ាទើបតែបានធ្វើការបញ្ជាក់នៅមុននេះបន្តិចថា សាកសពដែលក្រុមសង្គ្រោះបាន​រកឃើញនោះ គឺមានស្ត្រីម្នាក់ ក្មេងតូចម្នាក់ និងបុរសម្នាក់ ហើយបំណែកព្រមទាំងសម្ភារៈលើយន្តហោះ​មួយចំនួនទៀត ក៏ត្រូវបានស្រង់ចេញពីក្នុងទឹកសមុទ្រផងដែរ។ នេះបើតាមការចេញផ្សាយដោយ ទីភ្នាក់ងារព័ត៌មានចិនស៊ិនហួរ នារសៀលថ្ងៃព្រហស្បតិ៍ ទី០៨ ខែមិថុនា ឆ្នាំ២០១៧។

បំណែករបស់យន្តហោះ និងសាកសពមនុស្សទាំងបីនាក់ខាងលើនេះ ត្រូវបានរកឃើញនៅលើដែនទឹកចម្ងាយ ២២.៤គីឡូម៉ែត្រពីតំបន់ Kyauk Ni Maw របស់ក្រុង Laung Lone ភាគខាងត្បូងមីយ៉ាន់ម៉ា ជាប់ដែនសមុទ្រ Andaman ដែលជាកន្លែងយន្តហោះយោធាធ្លាក់កាលពីថ្ងៃពុធម្សិលមិញ។ យន្តហោះយោធាមីយ៉ាន់ម៉ា​ខាងលើនេះ មានផ្ទុកមនុស្ស១២២នាក់ (យោធាទើបចេញមកអះអាងតួលេខថ្មី ដោយកាលពីមុនគឺមានតែ ១០៤នាក់) ក្នុងនោះ ១០៨នាក់ជាកងកម្លាំងយោធា។

គួរបញ្ជាក់ថា ប្រតិបត្តិការសង្គ្រោះ និងរុករកមនុស្សបាត់ខ្លួននាពេលនេះ មានការ​ចូលរួមពីនាវា​យោធា ០៩គ្រឿង​, យន្តហោះយោធា ០៥គ្រឿង និងឧទ្ធម្ភាគចក្រ ០២គ្រឿង ដែលសុទ្ធសឹង​តែ​ត្រូវបានបញ្ជូនមកពី​កងទ័ពអាកាស​មីយ៉ាន់ម៉ា។ ប្រភពព័ត៌មាន​ពីមន្ត្រីយោធា និងអាកាសចរណ៍ស៊ីវិលបានឱ្យដឹងថា យន្តហោះធ្វើដំណើរ​ក្នុងស្រុកប្រភេទ Y-8 មួយនេះ ដែលត្រូវបានផលិតនៅប្រទេសចិន បានដឹកកម្លាំងយោធា និងក្រុមគ្រួសាររបស់ពួកគេ ចេញពីទីក្រុង Myeik នៅវេលាម៉ោង ១៖០៦នាទីរសៀលថ្ងៃពុធ ឆ្ពោះទៅកាន់ទីក្រុង Yangon ដែលជាទីក្រុងធំមានមនុស្សរស់នៅច្រើនជាងគេ របស់ប្រទេសមីយ៉ាន់ម៉ា។

ដោយឡែកមូលហេតុដែលបណ្តាលឱ្យយន្តហោះធ្លាក់ នៅមិនទាន់​មានប្រភពណាមួយអាច​បញ្ជាក់បាននៅ​ឡើយទេ ប៉ុន្តែលោក Kyaw Kyaw Htey មន្ត្រីអាកាសចរណ៍ស៊ីវិល​មីយ៉ាន់ម៉ា​បានឱ្យដឹងថា លក្ខខណ្ឌអាកាសធាតុ​មានលក្ខណៈល្អប្រសើរ​ជាធម្មតាទេ នៅពេលដែលយន្តហោះ​ចាប់ផ្តើមចេញដំណើរ ប៉ុន្តែយោធាបានបញ្ជាក់​បន្ថែមចុងក្រោយនៅថ្ងៃព្រហស្បតិ៍នេះថា យន្តហោះខាងលើនេះ បានបាត់បង់ការទាក់ទងតែម្តង នៅពេលហោះឡើង​ដល់រយៈកម្ពស់ ៥.៤គីឡូម៉ែត្រ៕