(អាស៊ី)៖ ទីផ្សារភាគហ៊ុនជាច្រើននៅអាស៊ី បានធ្លាក់ដាំក្បាលចុះនៅព្រឹកថ្ងៃព្រហស្បតិ៍នេះ ខណៈក្រុមអ្នកវិនិយោគគិន កំពុងរង់ចាំមើលភាពភ្ញាក់ផ្អើល ដែល កើតចេញពីការបង្ហាញខ្លួន នៅចំពោះមុខព្រឹទ្ធសភាអាមេរិករបស់ នាយក FBI លោក ជែមស៍ ខូមី ព្រមទាំងលទ្ធផលនៃជំនួបប្រជុំគោលនយោបាយនៃធនាគារកណ្ដាលអឺរ៉ុប និងការបោះឆ្នោតសកល នៅអង់គ្លេស។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅព្រឹកថ្ងៃព្រហស្បតិ៍ ទី០៨ ខែមិថុនា ឆ្នាំ២០១៧។
សន្ទស្សន៍ភាគហ៊ុនអាស៊ីប៉ាស៊ីហ្វិក MSCI ក្រៅពីប្រទេសជប៉ុន MIAPJ0000PUS បានធ្លាក់ចុះអស់ ០.២៧ភាគរយ ខណៈភាគហ៊ុន Nikkei .N225 ជប៉ុនបានកើនឡើង ០.៣ភាគរយ ដោយសារតែការងើបឡើងវិញនៃប្រាក់ដុល្លារអាមេរិក បើធៀបទៅនឹងប្រាក់យ៉េនជប៉ុន។ ដោយឡែក កាលពីថ្ងៃពុធ (ម៉ោងនៅក្នុងសហរដ្ឋអាមេរិក) ទីផ្សារភាគហ៊ុនអាមេរិក Wall Street ក៏បានកើនឡើងវិញផងដែរ បើទោះជាតម្លៃថាមពលធ្លាក់ចុះក៏ដោយ បន្ទាប់ពីលោក James Comey បានអះអាងនៅ ក្នុងសេចក្ដី ថ្លែងការណ៍ផ្ញើជូនសភាអាមេរិកថា ប្រធានាធិបតីអាមេរិក លោក ដូណាល់ ត្រាំ បានស្នើឱ្យលោកបិទបញ្ចប់ការស៊ើបអង្កេត លើទំនាក់ទំនងរវាងអតីតទីប្រឹក្សាសន្តិសុខជាតិអាមេរិក លោក Michael Flynn ជាមួយមន្ត្រីរដ្ឋាភិបាលរុស្ស៊ី។
គួរបញ្ជាក់ថា ប័ណ្ណរតនាគាជាតិអាមេរិក សម្រាប់រយៈពេល១០ឆ្នាំ បានកើនឡើងដល់ ២.១៨៥ភាគរយ US10YT=RR ក្រោយបានធ្លាក់ចុះទាប ២.១២៩ភាគរយ កាលពីថ្ងៃអង្គារ៕
