(តេហេរ៉ង់)៖ បុរសខ្មាន់កាំភ្លើង​ជាច្រើននាក់ នៅថ្ងៃពុធនេះ បានបើកការបាញ់រះ​ទំាងកម្រោលនៅ​ក្នុងអគាររដ្ឋសភាអ៊ីរ៉ង់ ខណៈអត្តឃាតជន​ម្នាក់ទៀត បានចុចគ្រាប់បែក​បំផ្ទុះនៅឯទីតាំងផ្នូរ របស់ស្ថាបនិកសាធារណរដ្ឋអ៊ីរ៉ង់ លោក Ayatollah Khomeini នៅក្នុងរដ្ឋធានី​តេហេរ៉ង់​ដូចគ្នា ដោយបណ្ដាល​ឱ្យឆ្មាំយាមកាមម្នាក់ស្លាប់ និងមនុស្សជាច្រើននាក់​រងរបួស តែភ្លាមៗ​ពុំទាន់មានក្រុមណា មួយចេញមុខ​ទទួលខុសត្រូវ​នៅឡើយទេ ខណៈព័ត៌មានមិនទាន់ផ្លូវការអះអាង មនុស្សរហូតដល់០៧នាក់​ឯណោះ​បានស្លាប់។ នេះបើតាមការ​ចេញផ្សាយដោយ​សារព័ត៌មាន BBC​ នៅរសៀលថ្ងៃពុធ ទី០៧ ខែមិថុនា ឆ្នាំ២០១៧។

ជាមួយគ្នានោះដែរ បើតាមទីភ្នាក់ងារ​សារព័ត៌មានអ៊ីរ៉ង់ IRNA ការវាយប្រហារ​ទំាងពីរ​ហាក់ដូចជាត្រូវ​បានគេរៀបចំ និងកើតឡើងក្នុង​ពេលតែមួយ ហើយការវាយប្រហារ​របៀបនេះ គឺកម្រនឹង​កើតឡើងណាស់​នៅក្នុងប្រទេសអ៊ីរ៉ង់។ IRNA តាមរយៈការ​ដកស្រង់សម្ដីពី​សមាជិកសភា បានបញ្ជាក់​ទៀតថា បុរសម្នាក់បាន​បំផ្ទុះគ្រាប់បែក​អត្តឃាត នៅឯផ្នូរ​របស់​លោក Ayatollah Khomeini ដោយបណ្ដាល​ឱ្យមនុស្សជាច្រើននាក់​រងរបួស ប៉ុន្តែទន្ទឹមគ្នា​ក៏មានសេចក្ដីរាយការណ៍​ដែរថា មនុស្សម្នាក់បានស្លាប់ ដែលអាច ជាជនបំផ្ទុះគ្រាប់​អត្តឃាតនេះ​តែម្ដង។

ចំណែកឯ​នៅសភាអ៊ីរ៉ង់​​ឯណោះវិញ ក្រុមខ្មាន់កាំភ្លើង​មាន​គ្នាប្រហែល​ជាបីនាក់ បានបើកការ​បាញ់រះ​បង្ក​ឱ្យមនុស្ស​របួសជាច្រើននាក់ ក្នុងនោះមានឆ្មាំយាម​ម្នាក់បាន​ស្លាប់។ លើសពីនេះទៅទៀត ក្រុមមន្ត្រីសន្តិសុខអ៊ីរ៉ង់ បានដោះគ្រាប់បែក​មួយផ្សេងទៀត​ទាន់ពេលវេលាផងដែរ។

គួរបញ្ជាក់ថា បើតាមព័ត៌មាន​ក្រៅផ្លូវការមនុស្ស ០៧នាក់បានស្លាប់ ហើយការវាយប្រហារ​នេះកើតឡើងនៅ​ចំពេលទីក្រុងតេហេរ៉ង់ កំពុងជួយគាំទ្រ​កងកម្លាំង​រដ្ឋាភិបាលស៊ីរី ក្នុងការប្រយុទ្ធប្រឆាំង​នឹងក្រុមភេរវករ ISIS៕