(ហុងកុង)៖ រឿងរ៉ាវដ៏ព្រឺព្រួចមួយបានកើតឡើង តាំងតែពីថ្ងៃទី០៤ ខែមិថុនាមកម្ល៉េះ ប៉ុន្តែរបាយការណ៍​ទើប​តែត្រូវបានបង្ហាញជាសាធារណៈនៅព្រឹកថ្ងៃពុធនេះថា យន្តហោះដឹកអ្នកដំណើរ​មួយគ្រឿងរបស់អាកាសចរណ៍ចិន បានហោះហើរ​ស្ទើរតែបុកជល់នឹងភ្នំ ស្ថិតនៅលើកោះ Lantau បន្ទាប់ពីទើបហោះ​ឡើងពី អាកាសយានដ្ឋាន​​អន្តរជាតិ​ហុងកុង។ នេះបើតាម​ការដកស្រង់ការផ្សាយ​នៅមុននេះបន្តិចពី សារព័ត៌មាន Channel News Asia នាព្រឹកថ្ងៃពុធ ទី០៧ ខែមិថុនា ឆ្នាំ២០១៧។

យន្តហោះដឹកអ្នកដំណើរខាងលើ​របស់អាកាសចរណ៍ចិន Flight CA428 មានគោលដៅ​ឆ្ពោះទៅទីក្រុង Chengdu បានជួបប្រទះនូវភាពល្អៀង​នៃការហោះហើរ តាមរយៈការតាមដាន​របស់ផ្នែកបញ្ជាការ ដោយក្នុងនោះ​យន្តហោះបានរេទិសដៅ​ទៅភាគខាងត្បូង នៅលើភូម Tai O ដែលពោរពេញដោយប្រជុំភ្នំ។ ក្រុមបញ្ជាការ​​យន្តហោះ ភ្លាមៗបានចេញសេចក្តីព្រមានឲ្យអាកាសយានិក ធ្វើការកែតម្រង់ទិសដៅហោះហើរវិញ។ នេះបើតាម​ការ​ចេញផ្សាយដោយកាសែតចិន SCMP។

តាមក្រុមជំនាញ​ហុងកុងបានបញ្ជាក់ថា យន្តហោះខាងលើនេះ​គួរតែហោះហើរក្នុងរយៈកម្ពស់ ១.៣គីឡូម៉ែត្រ​ពីលើភ្នំនោះទើបជា​កម្រិតស្តង់ដារសុវត្ថិភាព ប៉ុន្តែពីឡុតទំនង​ជាបាត់បង់ម្ចាស់ការ​ ទើបបញ្ជាការហោះហើរ​ត្រឹមតែកម្ពស់ ១គីឡូម៉ែត្រប៉ុណ្ណោះ ដែលវាជាកម្រិតគ្រោះ​ថ្នាក់បំផុតមួយ ដែលងាយនឹង​ធ្វើឲ្យយន្តហោះ មានបញ្ហាជាមួយកម្លាំង​ទំនាញនៃតំបន់ភ្នំនោះ។

អ្នកជំនាញរបស់ហុងកុង លោក Jeremy Tam Man Ho បានលើកឡើងថា «ប្រសិនបើយន្តហោះ ដឹកអ្នកដំណើរ​ច្រើនជាងនេះ ឬដឹកទំនិញធ្ងន់​ជាងនេះ វាប្រាកដជាមិនអាច​ឆ្លងភ្នំនោះផុត ក្នុងរយៈកម្ពស់ទាប​បែបហ្នឹងនោះឡើយ។ ប្រសិនយន្តហោះ​ហោះនៅលើតំបន់ភ្នំនោះ ក្នុងរយៈកម្ពស់ទាប​ជាងនេះតែ​បន្តិចទៀត នោះអ្នកនឹងអាចស្រមៃហើយថា នឹងមានមហន្តរាយអ្វីកើតឡើង»។ អាកាសចរណ៍ចិនក៏បានចេញមុខ​បកស្រាយផងដែរ​ចំពោះរឿងនេះ នឹងសន្យាបង្កើនការប្រុងប្រយ័ត្ន និងប្រព័ន្ធសុវត្ថិភាព​បន្ថែមទៀត៕