(ម៉ូស្គូ)៖ នៅក្នុងការផ្តល់បទសម្ភាសន៍ឲ្យ លោក Oliver Stone អ្នកដឹកនាំខ្សែភាពយន្តដ៏ល្បី របស់សហរដ្ឋអាមេរិក ប្រធានាធិបតីរុស្ស៊ី លោក វ្ល៉ាឌីមៀ ពូទីន បានលើកឡើងថា គ្មានប្រទេសណាមួយ​នៅលើភពផែនដីនេះ​នៅរស់រានបានឡើយ ប្រសិនបើសង្គ្រាមនុយក្លេអ៊ែរផ្ទុះឡើង រវាងមហាអំណាចដែល​ខ្លាំងជាងគេបំផុតលើលោក។ នេះបើតាមការចេញ​ផ្សាយដោយ បណ្តាញព័ត៌មានរុស្ស៊ី RT នាព្រឹកថ្ងៃពុធ ទី០៧ ខែមិថុនា ឆ្នាំ២០១៧។

លោក Stone បានសួរសំនួរជាច្រើនទៅកាន់ លោក ពូទីន ហើយនៅក្នុងនោះ​ចំណុចដែលគួរឲ្យ​ចាប់អារម្មណ៍ គឺសំនួរមួយពាក់ព័ន្ធទៅនឹង​ការប្រកួតប្រជែងនៃមនុស្សជាតិ ដែលនឹងអាចហក់ចូលទៅក្នុងសង្គ្រាមនុយក្លេអ៊ែរ ធ្វើឲ្យប្រជាជនជំនាន់ក្រោយៗកាន់តែមានការភ័យខ្លាច ហើយបើវានឹងអាចផ្ទុះឡើងពិតមែន តើលោក ពូទីន រំពឹងទេថា សហរដ្ឋអាមេរិក​នឹងទទួលបានជោគជ័យ លើសង្គ្រាមនោះដែរ ឬទេ?

លោក ពូទីន បានឆ្លើយតបវិញយ៉ាងដូច្នេះថា «ខ្ញុំគិតថា នឹងគ្មាននរណាម្នាក់​នៅរស់រានឡើយ បើកើតមាន​ជម្លោះបែបនោះមែន»។ នេះជាចម្លើយដ៏ខ្លី​ចេញពីមាត់ លោក ពូទីន ខណៈដែលកិច្ចសម្ភាសន៍របស់​លោក នឹងត្រូវចាក់ផ្សាយពេញលេញតែម្តង នៅសប្តាហ៍ក្រោយនេះសម្រាប់បណ្តាញទូរទស្សន៍ និងសារព័ត៌មាន​របស់រុស្ស៊ី ព្រមទាំងអាមេរិកផងដែរ។

ទោះបីជាយ៉ាងណាក៏ដោយ លោក ពូទីន ហាក់ចង់បង្ហាញថា លោកមានការកាន់កាប់យុទ្ធសាស្ត្រយោធា យ៉ាងរឹងមាំនៅក្នុងដៃ ហើយវាជាផ្នែកមួយដែលបញ្ជាក់យ៉ាងច្បាស់ថា រាល់ស្ថានភាពរបស់​ប្រទេសមហា​អំណាចយោធា​បន្ទាប់ពីអាមេរិកនេះ គឺជាអ្នកស្ថិតនៅ​ក្នុងការអិវឌ្ឍ​ជាប់ជានិច្ច និងជាអ្នកលេង​ល្ខោនយោធា យ៉ាងជំនាញនៅក្នុង​ប្រទេសស៊ីរី។ បច្ចុប្បន្នស្ថានភាព​នៃទំនាក់ទំនងរវាងរុស្ស៊ី និងអាមេរិក​នៅមិនទាន់​មានភាពល្អប្រសើរ​នោះឡើយ ដោយយោងលើ​បញ្ហាភេរវកម្ម និងការចោទប្រកាន់​រុស្ស៊ីពីសំណាក់អាមេរិក ជុំវិញការលូកលាន់​កិច្ចការបោះឆ្នោត កាលពីខែវិច្ឆិកា ឆ្នាំ២០១៦៕​