(វ៉ាស៊ីនតោន)៖ អ្នកជំនាញម្នាក់មកពីវិទ្យាស្ថានសម្រាប់កិច្ចការតំបន់ឈូងសមុទ្រហ្គូល លោក អាលី អាល់ អះម៉ាត់ (Ali al-Ahmed) បាននិយាយថា ការសម្រេចចិត្តរបស់អារ៉ាប៊ីសាអូឌីត កាត់ផ្ដាច់រាល់ទំនាក់ទំនងការទូតជាមួយកាតា អាចជាចេតនាមួយនៃការត្រៀមខ្លួន ចូលឈ្លានពានប្រទេសជាសេដ្ឋីប្រេងដ៏តូចមួយនេះ ដើម្បីរឹបអូសធនធានផ្គាប់ចិត្តសហរដ្ឋអាមេរិក ដែលលោកយល់ថា កំពុងត្រូវការលុយជាច្រើនពីអារ៉ាប៊ីសាអូឌីត។ នេះបើតាមការចេញផ្សាយដោយសារព័ត៌មាន Sputnik នៅរសៀលថ្ងៃអង្គារ ទី០៦ ខែមិថុនា ឆ្នាំ២០១៧។
សង្រ្គាមការទូតនៅពិភពអារ៉ាប់ ផ្ទុះឡើងតែជាងពីរសប្ដាហ៍ប៉ុណ្ណោះ ក្រោយប្រធានាធិបតីអាមេរិក លោក ដូណាល់ ត្រាំ បំពេញទស្សនកិច្ចនៅអារ៉ាប៊ីសាអូឌីត ដោយនៅពេលនោះលោក ត្រាំ បានញុះញង់ឱ្យបណ្ដាប្រទេសអារ៉ាប់ងើបឡើងតតាំងជាមួយអ៊ីរ៉ង់ ដែលលោកផ្ទាល់ចាត់ទុកថា ជាម៉ែឪពួកភេរវករ។ ប៉ុន្តែក្រោយមកទៀតការប៉ះទង្គិច ពាក្យសម្ដីរវាងកាតា និងអារ៉ាប៊ីសាអូឌីត ស្រាប់តែផ្ទុះឡើងដោយសារទីភ្នាក់ងារសារព័ត៌មានកាតាមួយ បានចុះផ្សាយនូវសម្រង់សម្ដីរបស់មេដឹកនាំកាតា តាមីម ហាម៉ាត់ អាល់ថានី ដែលមានទំនោរគាំទ្រអ៊ីរ៉ង់ និងរិះគន់លើទីក្រុងរីយ៉ាដ សម្រាប់ការចំណាយប្រាក់ដ៏ច្រើនសន្ធឹកសន្ធាប់ ទិញអាវុធពីសហរដ្ឋអាមេរិក។
ទោះជាយ៉ាងនេះក្ដី ទីក្រុងដូហាបានអះអាងថា មេដឹកនាំ អាល់ថានី មិនបាននិយាយដូច្នេះឡើយ ហើយថា គេហទំព័រសារព័ត៌មានកាតានោះ ត្រូវបានពួកចោរព័ត៌មានវិទ្យាចូលលុកលុយ ។ ម្យ៉ាងវិញទៀតកាតាក៏បានចាត់ទុកដែរថា ការប្រកាសកាត់ផ្ដាច់ទំនាក់ទំនងការទូត គឺជារឿងអយុត្តិធម៌ និងមិនអាចទទួលបានជាដាច់ខាត។
ដោយឡែកជុំវិញវិបត្តិនេះដែរ ថ្លែងប្រាប់សារព័ត៌មានរុស្ស៊ី Sputnik នាយក និងជាស្ថាបនិកវិទ្យាស្ថានសម្រាប់កិច្ចការតំបន់ឈូងសមុទ្រហ្គូល លោក អាលី អាល់ អះម៉ាត់ បានគូសបញ្ជាក់ដូច្នេះថា «ខ្ញុំនិយាយពីការចូលឈ្លានពានប្រទេសកាតា... ពីព្រោះខ្ញុំទទួលបានសេចក្ដីរាយការណ៍ ពីចលនាយោធាអារ៉ាប៊ីសាអូឌីត នៅក្បែរ តំបន់ព្រំដែនជាប់ជាមួយកាតា... យោធាអារ៉ាប៊ីសាអូឌីត ពួកគេកំពុងត្រៀមខ្លួន ហើយការលុកលុយនេះអាចកើតឡើង លឿនជាងការរំពឹងទុកក៏ថាបាន។ ទីក្រុងរីយ៉ាដជារឿយៗ តែងតែដឹកនាំការវាយប្រហារតាមផ្លូវអាកាសនៅយ៉េមែន... ប៉ុន្តែមួយរយៈពេលចុងក្រោយនេះ ការវាយប្រហារប្រឆាំងនឹងក្រុមឧទ្ទាមហ៊ូទីនៅ ប្រទេសយ៉េមែន បានថយចុះយ៉ាងកំហុគ ដែលនេះគឺជាសញ្ញាមួយដ៏សំខាន់ អាចបញ្ជាក់បានថា ទីក្រុងរីយ៉ាដ កំពុងប្រមូល និងត្រៀមកងទ័ពរបស់ខ្លួនដើម្បីវាយលុកលើកាតា។ ជាងនេះទៅទៀត អារ៉ាប៊ីសាអូឌីត ត្រូវការលុយទំាងដៃស្ដាំ និងដៃឆ្វេង ត្បិតបច្ចុប្បន្នប្រធានាធិបតីអាមេរិក លោក ដូណាល់ ត្រាំ បានដាក់សំណើ ហិរញ្ញវត្ថុថ្មីមួយលើពួកគេ (អារ៉ាប៊ីសាអូឌីត)... ដូច្នេះពួកគេនឹងខ្វះលុយដ៏ច្រើនសន្ធឹកសន្ធាប់ ហើយជាមួយនឹងសំណើនេះ ពួកគេត្រូវការប្រភពលុយថ្មីជាបន្ទាន់»។
គួរបញ្ជាក់ថា អារ៉ាប៊ីសាអូឌីត, បារ៉ែន, អេមីរ៉ាត់អារ៉ាប់រួម និងអេហ្ស៊ីប អាជ្ញាធរនៅភាគខាងកើតប្រទេសលីប៊ី យ៉េមែន និងម៉ាល់ឌីវ បានប្រកាសកាត់ផ្ដាច់ទំនាក់ទំនងការទូត បិទព្រំដែនទឹក-គោក និងអាកាសជាមួយកាតា ដោយចោទថា ទីក្រុងដូហាបានបង្កអស្ថេរភាពនៅក្នុងតំបន់ ព្រមទំាងគាំទ្រក្រុមភេរវករ។ យ៉ាងណាក៏ដោយ បើតាមលោក អាលី អាល់អះម៉ាត់ អារ៉ាប៊ីសាអូឌីត នឹងមិនចូលឈ្លានពានកាតាតែម្នាក់ឯងនោះទេ ពោលគឺទីក្រុងរីយ៉ាដ ត្រូវការគាំទ្រពីអេហ្ស៊ីប អេមីរ៉ាត់អារ៉ាប់រួម បារ៉ែន ហើយជាពិសេសត្រូវរង់ចាំភ្លើងខៀវ ពីទីក្រុងវ៉ាស៊ីនតោនជាមុនសិន៕
