(គុយវ៉ែត)៖ មេដឹកនាំគុយវ៉ែត ព្រះចៅ Sheikh Sabah al-Ahmad al-Jaber al-Sabah បានជម្រុញឱ្យសមភាគី កាតា ព្រះចៅ Tamim Hamad al-Thani នៅក្នុងកិច្ចសន្ទនាតាមទូរស័ព្ទ បញ្ជៀសរាល់ការធ្វើសកម្មភាពទាំងឡាយណា ដែលបង្កឱ្យជម្លោះការទូតជាមួយបណ្ដាប្រទេសឈូងសមុទ្រ (Gulf states) កាន់តែតានតឹងឡើង។ នេះបើតាមសេចក្ដីថ្លែងការណ៍របស់មេកដឹកនាំគុយវ៉ែត ដកស្រង់ដោយសារព័ត៌មាន Sputnik នៅព្រឹកថ្ងៃអង្គារ ទី០៦ ខែមិថុនា ឆ្នំា២០១៧។
ការថ្លែងបែបនេះរបស់មេដឹកនាំគុយវ៉ែត ធ្វើឡើងបន្ទាប់ពី អារ៉ាប៊ីសាអូឌីត បារ៉ែន អេមីរ៉ាត់អារ៉ាប់រួម និងអេហ្ស៊ីប បានប្រកាសកាត់ផ្ដាច់ទំនាក់ទំនងការទូត បិទព្រំដែនទឹក-គោក និងអាកាសជាមួយកាតា ដោយចោទថា ទីក្រុងដូហាបានបង្កអស្ថេរភាពនៅក្នុងតំបន់ ព្រមទំាងគាំទ្រក្រុមភេរវករ។ ប៉ុន្តែមកទល់ពេលនេះ សង្រ្គាមការទូតរវាងប្រទេសអ្នកកាន់សាសនាអ៊ីស្លាមភាគច្រើនទាំងនេះ កាន់តែរីករាលដាលធំៗទៅ ពោលគឺអាជ្ញាធរនៅភាគខាងកើតប្រទេសលីប៊ី យ៉េមែន និងម៉ាល់ឌីវក៏បានប្រកាសផ្ដាច់ទំនាក់ទំនងការទូត ជាមួយកាតាផងដែរ។
យ៉ាងណាក៏ដោយ មេដឹកនាំគុយវ៉ែតព្រះចៅ Sheikh Sabah នៅតែបញ្ជាក់ឡើងវិញពីសារៈសំខាន់ នៃការពង្រឹងការធ្វើសកម្មភាពរួមគ្នា រវាងបណ្ដាប្រទេសឈូងសមុទ្រពែក ដើម្បីបម្រើជាផលប្រយោជន៍ដល់ អង្គការក្រុមប្រឹក្សាកិច្ចសហប្រតិបត្តិការ នៃប្រទេសឈូងសមុទ្រហ្គូល (GCC) ដែលមានសមាជិកដូចជា បារ៉ែន គុយវ៉ែត អូម៉ង់ កាតា អារ៉ាប៊ីសាអូឌីត និងអេមីរ៉ាត់អារ៉ាប់រួម។
គួរបញ្ជាក់ថា សង្រ្គាមការទូតនៅអារ៉ាប់ ផ្ទុះឡើងតែជាងពីរសប្ដាហ៍ប៉ុណ្ណោះ ក្រោយប្រធានាធិបតីអាមេរិក លោក ដូណាល់ ត្រាំ បំពេញទស្សនកិច្ចនៅអារ៉ាប៊ីសាអូឌីត ដោយនៅពេលនោះលោក ត្រាំ បានញុះញង់ឱ្យបណ្ដាប្រទេសអារ៉ាប់ ងើបឡើងតតាំងជាមួយអ៊ីរ៉ង់ ដែលលោកផ្ទាល់ចាត់ទុកថា ជាម៉ែឪនៃពួកភេរវករ។ ប៉ុន្តែក្រោយមកទៀត ការប៉ះទង្គិចពាក្យសម្ដីរវាងកាតា និងអារ៉ាប៊ីសាអូឌីត ស្រាប់តែផ្ទុះឡើងដោយសារទីភ្នាក់ងារសារព័ត៌មានកាតាមួយ បានចុះផ្សាយនូវសម្រង់សម្ដីរបស់មេដឹកនាំ គឺព្រះចៅ al-Thani ដែលមានទំនោរគាំទ្រអ៊ីរ៉ង់ និងរិះគន់លើទីក្រុងរីយ៉ាត សម្រាប់ការចំណាយប្រាក់ដ៏ច្រើនសន្ធឹកសន្ធាប់ ទិញអាវុធពីសហរដ្ឋអាមេរិក។
ទោះបីជាយ៉ាងនេះក្ដី ទីក្រុងដូហាបានអះអាងថា ព្រះចៅ al-Thani មិនបាននិយាយដូច្នេះឡើយ ហើយថា គេហទំព័រសារព័ត៌មានកាតានោះ ត្រូវបានពួកចោរព័ត៌មានវិទ្យាចូលលុកលុយ។ ម្យ៉ាងវិញទៀត កាតាក៏បានចាត់ទុកដែរថា ការប្រកាសកាត់ផ្ដាច់ទំនាក់ទំនងការទូតគឺជារឿងអយុត្តិធម៌ និងមិនអាចទទួលបានជាដាច់ខាត៕
