(វ៉ាស៊ីនតោន)៖ ក្រុមហ៊ុន Apple នៅថ្ងៃចន្ទសប្តាហ៍នេះ បានបង្ហាញពី Smart Speaker របស់ខ្លួនមាន​ឈ្មោះថា HomePod ដែលមានសមត្ថភាព​បញ្ជាដោយសំឡេង ក្នុងការដំណើរ​ការកម្មវិធីតន្ត្រី ឬក៏ផ្ញើសារ SMS​ ដែលនេះនឹងអនុញ្ញាតឱ្យក្រុមហ៊ុនយក្សអាមេរិកផ្នែកបច្ចេកវិទ្យា​ឈានមុខមួយនេះ ប្រកួតប្រជែងជា​មួយនឹងផលិតរបស់ ក្រុមហ៊ុន Amazon និងGoogle។ នេះបើតាម​ការចេញផ្សាយ​ដោយ​សារព័ត៌មាន USTODAY នៅព្រឹកថ្ងៃអង្គារ ទី០៦ ខែមិថុនា ឆ្នាំ២០១៧។

ថ្លែងនៅក្នុងសន្និសីទសារព័ត៌មាន​ប្រចាំឆ្នាំ អ្នកតំណាងផ្នែកទីផ្សារ​ក្រុមហ៊ុន Apple លោក Philip Schiller បានបញ្ជាក់ថា HomeP​od នឹងត្រូវដាក់លក់​ក្នុងតម្លៃ ៣៤៩ដុល្លារ ហើយនឹងត្រូវដាក់លក់​មុនគេនៅខែធ្នូ​ខាងមុខនេះ នៅសហរដ្ឋអាមេរិក អង់គ្លេស និងអូស្ត្រាលី មុននឹងត្រូវចែកចាយ​នៅទូទាំង​ពិភពលោក។  HomeP​od គឺជាប្រភេទ SmartSpeaker មានរាងស៊ីឡាំង និងខ្ពស់ទាបជាង ២០សង់ទីម៉ែត្រ ព្រមទំាងមាន​មីក្រូហ្វូន​ចំនួន ០៦ អាចបញ្ជានឹង​សំឡេងបាន ដោយសារតែវាមាន​បំពាក់ប្រព័ន្ធបច្ចេកវិទ្យា​​សំឡេង Siri ដែលត្រូវបានតម្លៃ​ផងដែរ​នៅលើ iPhones​ និង iPads។

គួរបញ្ជាក់ថា ក្រុមហ៊ុន Apple ក៏កំពុងត្រៀមដាក់តាំងបង្ហាញ​ផងដែរ iP​ad Pro ជំនាន់ថ្មីរបស់ខ្លួនមានពីរ​ទំហំគឺ iP​ad Pro ១០.៥អ៊ីញ និង១២.៩អ៊ីញ ដែលដំណើរការ​ដោយកម្មវិធី iOS11។ iP​ad Pro ១០.៥អ៊ីញ ៦៤GB​ អាចនឹងត្រូវដាក់នៅសហរដ្ឋអាមេរិកក្នុងតម្លៃប្រមាណជា ៧៩៩ដុល្លារ រីឯ iPad Pro ១២.៩អ៊ីញ ៦៤GB មានតម្លៃ ៩៩៣ដុល្លារ៕