(ឡុងដ៍)៖ សេវាសុខាភិបាលជាតិនៃចក្រភពអង់គ្លេសបានឲ្យដឹងថា មកទល់ថ្ងៃចន្ទនេះ មនុស្សចំនួន៣៦នាក់ កំពុងនៅបន្តសម្រាកព្យាបាលរបួសនៅឯមន្ទីរពេទ្យនៅឡើយទេ ដោយក្នុងចំណោមនោះមាន១៨នាក់ស្ថិតក្នុងសភាពធ្ងន់ធ្ងរ បន្ទាប់ពីករណីវាយប្រហារដោយភេរវកម្មបានផ្ទុះឡើងសាជាថ្មីម្តងទៀត នៅក្នុងទីក្រុងឡុងដ៍ កាលពីថ្ងៃអាទិត្យកន្លងទៅ ដែលបានបណ្តាលឲ្យមនុស្សយ៉ាងតិច០៧នាក់បាត់បង់ជីវិត និងរបួស៤៨នាក់ រីឯជនសង្ស័យជាភេរវករចំនួន ០៣នាក់ទៀត ត្រូវបានប៉ូលិសអង់គ្លេសបាញ់សម្លាប់ ខណៈមនុស្ស១២នាក់ក៏ត្រូវបានចាប់ខ្លួនផងដែរ។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅយប់ថ្ងៃចន្ទ ទី០៥ ខែមិថុនា ឆ្នាំ២០១៧។
បើតាមប៉ូលិសអង់គ្លេសកាលពីថ្ងៃសៅរ៍ នាម៉ោងប្រហែលជា២២៖០៨នាទីយប់ (ពេលវេលានៅទីក្រុងឡុងដ៏) មានសេចក្ដីរាយការណ៍បន្ទាន់ថា ក្រុមភេរវករចំនួនបីនាក់ បានបើករថយន្ដមួយគ្រឿងសំដៅបំបុកហ្វូងមនុស្សនៅលើស្ពាន London Bridge ហើយបន្ទាប់មកទៀតបានធ្វើសកម្មភាពចាក់មនុស្សឲ្យរបួសធ្ងន់ស្រាលជាច្រើននាក់នៅក្នុងផ្សារ Borough Market ដែលស្ថិតនៅមិនឆ្ងាយប៉ុន្មានឡើយពីស្ពានមួយនេះ នៅមុនពេលត្រូវបានកម្លាំងប៉ូលិសប្រើគ្រាប់កាំភ្លើងប្រមាណ៥០គ្រាប់ដើម្បីបាញ់សម្លាប់។ ដោយឡែកក្រុមសកម្មប្រយុទ្ធ ISIS តាមរយៈប្រព័ន្ធផ្សព្វផ្សាយរបស់ខ្លួនឈ្មោះ Amaq បានអះអាងថាជនសង្ស័យជាភេរវករទាំង០៣នាក់ខាងលើ គឺជាក្រុមអ្នកប្រយុទ្ធរបស់ខ្លួន ដោយថែមទាំងអះអាងទៀតថា ពួកគេនឹងបន្តដឹកនាំសកម្មភាពវាយប្រហារ របៀបនេះជាថ្មីម្ដងទៀត។
គួរបញ្ជាក់ថា ការវាយប្រហារខាងលើ បានកើតឡើងតែពីរសប្ដាហ៍ប៉ុណ្ណោះ ក្រោយមនុស្សចំនួន២២នាក់ ត្រូវបានសម្លាប់ និងរាប់សិបនាក់ផ្សេងទៀត នៅក្នុងការវាយប្រហារដោយបំផ្ទុះគ្រាប់បែកអត្តឃាតរបស់ក្រុម ISIS នៅក្នុងទីក្រុង Manchester៕
