(ឡុងដ៏)៖ ក្រុម ISIS ជាថ្មីម្ដងទៀត​បានអះអាងថា ខ្លួនជាអ្នកនៅពីក្រោយ​ការវាយប្រហារដោយភេរវកម្ម កាលពីថ្ងៃអាទិត្យ ក្នុងទីក្រុងឡុងដ៍ចក្រភពអង់គ្លេស ដែលបណ្ដាលឱ្យមនុស្សយ៉ាងហោច​ណាស់ ០៧នាក់ស្លាប់ និងរបួស៤៨នាក់ រីឯជនសង្ស័យ​ជាភេរវករ ០៣នាក់ទៀត ត្រូវបាន​បាញ់សម្លាប់ ខណៈមនុស្ស​១២នាក់ក៏ត្រូវបានចាប់ខ្លួនផងដែរ នៅក្នុងប្រតិបត្តិការ​វាយឆ្មក់ពីរលើលដាច់​ដោយឡែក​ពីគ្នា នៅភាគខាងកើត​ទីក្រុងឡុងដ៍។ នេះបើតាម​ការចេញផ្សាយ​ដោយ​សារព័ត៌មាន Channel News Asia នៅព្រឹកថ្ងៃចន្ទ ទី០៥ ខែមិថុនា ឆ្នាំ២០១៧។

បើតាមប៉ូលិសអង់គ្លេសកាលពីថ្ងៃអាទិត្យ នៅម៉ោងប្រមាណ ២២៖០៨នាទីយប់ (ម៉ោងនៅក្នុងទីក្រុងឡុងដ៏) មានសេចក្ដីរាយការណ៍​បន្ទាន់ថា មានរថយន្ដមួយ​គ្រឿងបានបើកបំបុក​ហ្វូងមនុស្សនៅឯស្ពាន London Bridge ហើយបន្ទាប់មក​ទៀតប៉ូលិស​បានបាញ់កាំភ្លើងជាច្រើន​គ្រាប់ ជាការឆ្លើយតបនឹងអំពើចាក់មនុស្សឱ្យ របួសធ្ងន់ស្រាលជាច្រើននាក់ នៅក្នុងផ្សារ Borough Market ដែលស្ថិតនៅមិនឆ្ងាយ​ប៉ុន្មានឡើយពី​ស្ពានមួយនេះ។ ដោយឡែក​ក្រុម ISIS តាមរយៈប្រព័ន្ធ​ផ្សព្វផ្សាយ របស់ខ្លួន​ឈ្មោះ Amaq បានអះអាងថា ជនសង្ស័យជា​ភេរវករទាំង​០៣នាក់ខាងលើ គឺជាក្រុមអ្នកប្រយុទ្ធ​របស់ខ្លួន ដោយថែមទាំងអះអាង​ទៀតថា ពួកគេនឹងបន្តដឹកនាំ​សកម្មភាព​វាយប្រហារ របៀបនេះជាថ្មី​ម្ដងទៀត។    

គួរបញ្ជាក់ថា ការវាយប្រហារ​ក្នុងទីក្រុងឡុងដ៍ កើតឡើងតែពីរ​សប្ដាហ៍ប៉ុណ្ណោះ ក្រោយមនុស្ស​២២នាក់ ត្រូវបានសម្លាប់​នៅក្នុងការវាយប្រហារ​ដោយបំផ្ទុះគ្រាប់បែកអត្តឃាត របស់ក្រុម ISIS​ នៅក្នុងទីក្រុង Manchester៕