(កាប៊ុល)៖ ករណីផ្ទុះបន្តបន្ទាប់គ្នាដ៏កក្រើក បានកើតឡើងសាជាថ្មីម្តងទៀត នៅឯរដ្ឋធានីកាប៊ុល នៃប្រទេសអាហ្វហ្គានីស្ថាន ក្នុងអំឡុងពេលមួយសប្តាហ៍នេះ ខណៈ​ហេតុ​​ការណ៍នាថ្ងៃសៅរ៍នេះ បានបណ្តាលឲ្យមនុស្សយ៉ាងតិចចំនួន២០នាក់ស្លាប់ និង៨៧នាក់ផ្សេងទៀតទទួលរបួស នៅក្នុងពិធីបុណ្យសពមួយកន្លែង។ នេះ​បើ​តាមតួលេខពីក្រសួងសុខាភិបាលអាហ្វហ្គានីស្ថាន ដកស្រង់ដោយសារព័ត៌មាន Russia Today (RT) នៅយប់ថ្ងៃសៅរ៍ ទី០៣ ខែមិថុនា ឆ្នាំ២០១៧។

បុណ្យសពខាងលើនេះ គឺជារបស់កូនប្រុសព្រឹទ្ធសមាជិកអាហ្វហ្គានីស្ថានម្នាក់ ដែលស្ថិតក្នុងចំណោមជនរងគ្រោះសរុប០៥នាក់ ដែលបានបាត់​បង់​ជីវិត​នៅ​ពេលប៉ូលិសបានបើកការបាញ់រះទៅលើក្រុមអ្នកតវ៉ា ក្នុងអំឡុងនៃការធ្វើបាតុកម្មមួយកាលពីថ្ងៃសុក្រម្សិលមិញ ប្រឆាំងនឹងការធ្លាក់​ចុះ​ដុន​ដាបកាន់តែ​ខ្លាំង​នៃ​សន្តិ​សុខក្នុងប្រទេស។ យោងតាមសេចក្តីរាយការណ៍ព័ត៌មានក្នុងស្រុករបស់អាហ្វហ្គានីស្ថាន ខណៈពេលដែលពិធីបុណ្យបាននិងកំពុងប្រព្រឹត្តទៅហេតុ​ការណ៍​ផ្ទុះ​ដ៏​កក្រើកចំនួនបីលើកបានកើតឡើង។

ជុំវិញករណីវាយប្រហារនេះ ពុំទាន់មានក្រុមសកម្មប្រយុទ្ធណាមួយ ចេញមុខអះអាងថាជាទង្វើរបស់ខ្លួននៅឡើយទេ។ រីឯក្រុមឧទ្ទាមតាលីបង់ ដែលជាញឹក​ញាប់តែងបានបើកការវាយប្រហារដោយបំផ្ទុះគ្រាប់បែក កាលពីពេលកន្លងមក នៅអាហ្វហ្គានីស្ថានវិញនោះ បានចេញមុខបញ្ជាក់ភ្លាមៗថា ពួកខ្លួនមិនមានជាប់ពាក់ព័ន្ធនៅក្នុងករណីនេះ​នោះទេ។ ជាមួយគ្នានេះ គេក៏មិនទាន់ដឹងថាហេតុការណ៍ផ្ទុះទាំងបីលើកនេះ ត្រូវបានបង្កឡើងដោយសារអ្វីនោះដែរ។

គួរបញ្ជាក់ថា បើតាមតួលេខសរុបចុងក្រោយ ចេញផ្សាយដោយរដ្ឋាភិបាលអាហ្វហ្គានីស្ថាន ការបំផ្ទុះគ្រាប់បែកលើ​រថយន្តដ៏កក្រើក កាល​ពី​ថ្ងៃ​ពុធ​សប្តាហ៍​នេះ ក្នុងទីក្រុងកាប៊ុល ដែលស្ថិតចំតំបន់ក្បែរស្ថានទូតអាល្លឺម៉ង់ និងអ៊ីរ៉ង់នោះ បានបណ្តាលឲ្យមនុស្សស្លាប់៩០នាក់ និងរងរបួស ៤៦០នាក់៕