(សេអ៊ូល)៖ ប្រធានាធិបតី​កូរ៉េខាងត្បូង លោក មូន ជេអ៊ីន បានស្នើសុំឱ្យ​អតីតអគ្គលេខាធិការ​អង្គការសហប្រជាជាតិ លោក បាន គីមូន ជួយ ផ្ដល់យោបល់​លើបញ្ហាកិច្ចការ​បរទេស និងគោលនយោបាយ​សន្តិសុខ​នៅក្នុងជំនួបមួយ​នៅថ្ងៃសុក្រនេះ ខណៈលោកកំពុងឈឺក្បាល​ នឹងរឿង​ប្រព័ន្ធមីស៊ីល THAAD​ និងកម្មវិធីអាវុធ​នុយក្លេអ៊ែរ​កូរ៉េខាងជើង។ នេះបើតាមវិមាន​ប្រធានាធិបតី Cheong Wa Dae ដកស្រង់ដោយ​ទីភ្នាក់ងារសារព័ត៌មាន យ៉ុនហាប់ នៅល្ងាចថ្ងៃសុក្រ ទី០២ ខែមិថុនា ឆ្នាំ២០១៧។

ជាមួយគ្នានោះដែរ​បើតាមអ្នកនាំពាក្យវិមាន Cheong Wa Dae លោក ផាក ស៊ូយ៉ុន (Park Soo-hyun) លោក បាន គីមូន និយាយថា លោក​ពេញចិត្តនឹងផ្ដល់យោបល់នៅពេលមានការស្នើសុំ។ «ខ្ញុំសប្បាយរីករាយ​ក្នុងការឆ្លើយតប​ទៅកាន់ លោកប្រធានាធិបតី និងសំណើ​នៃរដ្ឋាភិបាល​ថ្មីរបស់លោក សម្រាប់​ការប្រឹក្សាយោបល់​គ្រប់ពេលវេលា»។ នេះបើតាមសម្ដី​លោក បាន គីមូន។

គួរបញ្ជាក់ថា ជំនួបរវាងលោក បាន គីមូន និងលោក មូន ជេអ៊ីន ធ្វើឡើងនៅមុនពេលលោក មូន ផ្ទាល់ មានគំរោងជួប​ប្រធានាធិបតីអាមេរិក លោក ដូណាល់ ត្រាំ នៅក្នុងមិថុនានេះ។ មួយវិញទៀត នៅក្នុងជំនួបនេះ បញ្ហាដែលប្រធានាធិបតីកូរ៉េខាងត្បូង ចង់បានយោបល់ពីលោក បាន គីមូន គឺពាក់ព័ន្ធនឹងការដាក់​ពង្រាយប្រព័ន្ធការពារ​មីស៊ីលអាមេរិក THAAD នៅលើទឹកដីកូរ៉េខាងត្បូង ដែលកំពុង​បង្កភាពតានតឹង​ជាមួយ ទីក្រុងប៉េកាំងព្រមទំាងការបាញ់​សាកល្បងមីស៊ីលផ្លោង​ជាបន្តបន្ទាប់ ពីសំណាក់​កូរ៉េខាងជើង៕