(សេអ៊ូល)៖ រដ្ឋបាលថ្មីរបស់ប្រទេសកូរ៉េខាងត្បូង នឹងធ្វើជាអ្នកបើកមុខក្នុងការស្វែងរក ដំណោះស្រាយលើបញ្ហាកូរ៉េខាងជើង ដោយមិនពឹងផ្អែកទាំងស្រុងទៅលើប្រទេសដទៃទៀតនោះឡើយ។ នេះបើតាមសម្តីអះអាងដោយផ្ទាល់ របស់ប្រធានាធិបតីកូរ៉េខាងត្បូង លោក មូន ជែអ៊ីន ដកស្រង់ដោយទីភ្នាក់ងារព័ត៌មានកូរ៉េខាងត្បូង យុនហ៉ាប់ នៅល្ងាចថ្ងៃព្រហស្បតិ៍ ទី០១ ខែឧសភា ឆ្នាំ២០១៧។
លោក មូន ជែអ៊ីន បានថ្លែងថា «យើងនឹងធ្វើការដោះស្រាយបញ្ហា នៅក្នុងតំបន់ឧបទ្វីបកូរ៉េដោយខ្លួនផ្ទាល់ និងមិនត្រូវការអាស្រ័យ ពឹងពាក់លើតួនាទីរបស់បរទេសណាឡើយ។ យើងនឹងបើកកិច្ចផ្តួចផ្តើមថ្មីទាំងស្រុងមួយ ហើយអនុវត្តន៍វាប្រកបដោយភាពជឿជាក់ ដើម្បីសន្តិភាព និងភាពរុងរឿងជាយូរអង្វែងនៅឧបទ្វីបកូរ៉េ»។ លោក មូន បានបន្តថា កូរ៉េខាងត្បូងនឹងប្រើប្រាស់វិធីសាស្រ្ត លួងលោម បញ្ចុះបញ្ចូល និងការដាក់សម្ពាធប្រឆាំងនឹងកូរ៉េខាងជើង ដើម្បីធ្វើយ៉ាងណា បង្ខំឲ្យប្រទេសកុម្មុយនិស្តមួយនេះ សុខចិត្តមកអង្គុយក្នុងតុចរចាជាមួយគ្នា ជុំវិញកម្មវិធីនុយក្លេអ៊ែររបស់ខ្លួន។
លោកប្រធានាធិបតីកូរ៉េខាងត្បូងបានបញ្ជាក់ថា ការធ្វើតេស្តបាញ់មីស៊ីលនាពេលថ្មីៗនេះ របស់កូរ៉េខាងជើង គឺជាទង្វើបង្កហេតុដ៏ធ្ងន់ធ្ងរបំផុតមួយ មិនត្រឹមតែចំពោះឧបទ្វីបកូរ៉េនោះទេ តែក៏ចំពោះសន្តិភាព និងស្ថិរភាពអន្តរជាតិផងដែរ។ គួរបញ្ជាក់ថា ទោះបីជាកូរ៉េខាងត្បូងមិនបានអះអាងចំឈ្មោះប្រទេសណាក៏ដោយ ប៉ុន្តែសម្រាប់ប្រទេស ដែលបានចូលរួមកិច្ចចរចា ០៦ភាគី ជាគោលសំខាន់នៃការដោះស្រាយបញ្ហាកូរ៉េខាងជើងកន្លងមកមានដូចជា អាមេរិក ចិន រុស្ស៊ី ជប៉ុន កូរ៉េខាងជើង និងកូរ៉េខាងត្បូងផ្ទាល់តែម្តង៕
