(វ៉ាស៊ីនតោន)៖ មេដឹកនាំអាមេរិក លោក ដូណាល់ ត្រាំ បានប្រកាសថ្កោលទោស ការបំផ្ទុះគ្រាប់បែកដ៏កក្រើក​ក្នុងទីក្រុងកាប៊ុល ប្រទេសអាហ្វហ្គានីស្ថាន កាលពីព្រឹកថ្ងៃពុធ ទី៣១ ខែឧសភា និងបានសន្យាទៀតថា អាមេរិកកំពុងគិតគូរពីការផ្តល់ជំនួយ មកកាន់រដ្ឋាភិបាលអាហ្វហ្គានីស្ថាន ដូចជាការបង្កើនចំនួនកងទ័ព ដើម្បីតាមប្រមាញ់រកជនដៃដល់ ដែលប្រព្រឹត្តអំពើភេរវកម្ម ខាងលើនេះផងដែរ។ នេះបើតាមការចេញផ្សាយ​នៅមុននេះបន្តិច ដោយទីភ្នាក់ងារព័ត៌មានចិនស៊ិនហួរ នារសៀលថ្ងៃព្រហស្បតិ៍ ទី០១ ខែមិថុនា ឆ្នាំ២០១៧។

គួរបញ្ជាក់ថា សរុបតួលេខចុងក្រោយ ចេញផ្សាយដោយរដ្ឋាភិបាលអាហ្វហ្គានីស្ថាន ការបំផ្ទុះគ្រាប់បែកលើ​រថយន្តដ៏កក្រើកនៅទីក្រុងកាប៊ុល ស្ថិតនៅតំបន់ក្បែរស្ថានទូតអាល្លឺម៉ង់ និងអ៊ីរ៉ង់បានបណ្តាលឲ្យមនុស្សស្លាប់ ៨០នាក់ និងរងរបួស ៣៥០នាក់។ ក្នុងចំណោមមនុស្សស្លាប់ និងរងរបួសសទាំង ៤៣០នាក់ ក៏មានអ្នករាយការណ៍ព័ត៌មាន​ម្នាក់របស់បណ្តាញទូរទស្សន៍ BBC អង់គ្លេស និង បុគ្គលិកស្ថានទូតអាល្លឺម៉ង់​ម្នាក់​រងរបួស ខណៈបុគ្គលិកម្នាក់ទៀតរបស់​ស្ថានីយ៍ទូរទស្សន៍ TOLOnews TV របស់ក្រុមហ៊ុនផ្សព្វផ្សាយ Moby មានបេសកកម្ម​នៅអាហ្វហ្គានីស្ថានបានស្លាប់៕