(វ៉ាស៊ីនតោន)៖ នៅក្នុងការបង្ហាញវត្តមានលើវេទិកាសាធារណៈចុងក្រោយបំផុត អតីតរដ្ឋមន្រ្តីការបរទេសអាមេរិក លោកស្រី ហ៊ីលឡារី គ្លីនតុន បានស្តីបន្ទោសទៅលើគណបក្សប្រជាធិបតេយ្យ ប្រព័ន្ធផ្សព្វផ្សាយ ព័ត៌មានវាយប្រហារ និងសូម្បីតែជនជាតិរុស្ស៊ីដល់ទៅប្រមាណ ១,០០០នាក់ទៀតថា ពួកគេគឺជាមូលហេតុដែលបានបណ្តាលឲ្យ រូបលោកស្រី ចាញ់លោក ដូណាល់ ត្រាំ នៅក្នុងការបោះឆ្នោតជ្រើសរើសប្រធានាធិបតីអាមេរិក កាលពីឆ្នាំ២០១៦។ នេះបើតាមការចេញផ្សាយដោយសារព័ត៌មានរុស្ស៊ី Russia Today (RT) នៅរសៀលថ្ងៃព្រហស្បតិ៍ ទី០១ ខែមិថុនា ឆ្នាំ២០១៧។
ថ្លែងក្នុងសន្និសីទមួយនៅឯទីក្រុង Ranchos Palos Verdes នៃរដ្ឋកាលីហ្វរញ៉ា អតីតបេក្ខភាពប្រធានាធិបតីនៃបក្សប្រជាធិបតេយ្យវ័យ ៦៩ឆ្នាំរូបនេះបាននិយាយថា លោកស្រី ទទួលខុសត្រូវចំពោះរាល់ការសម្រេចចិត្តទាំងអស់ ដែលលោកស្រីបានធ្វើ ក៏ប៉ុន្តែបានបន្ថែមដូច្នេះថា «វាមិនមែនមូលហេតុ ដែលខ្ញុំបានទទួលបរាជ័យនោះឡើយ»។ លោកស្រី គ្លីនតុន ក៏បានបន្តលើកយកហេតុផលជាច្រើន ដែលបានធ្វើឲ្យលោកស្រីចាញ់ឆ្នោត រួមមានសេចក្តីរាយការណ៍យ៉ាងគគ្រឹកគគ្រេង របស់ប្រព័ន្ផ្សព្វផ្សាយនានា ជុំវិញការប្រើប្រាស់ Server អ៊ីម៉ែលឯកជន ដោយធាតុពិតគ្រាន់តែជារឿងតូចតាចមួយប៉ុណ្ណោះ។
ស្របពេលជាមួយគ្នា លោកស្រី ហ៊ីលឡារី គ្លីនតុន បានយល់ថា លោកស្រីគឺជាជនរងគ្រោះនៃការសន្មត់យ៉ាងទូលំទំលាយបំផុត ដែលថារូបលោកស្រីនឹងទទួលជ័យជម្នះមួយរយភាគរយ នៅក្នុងការបោះឆ្នោតឆ្នាំ២០១៦។ បន្ថែមពីនេះលោកស្រី គ្លីនតុន ក៏បានចោទប្រកាន់ការចូលលូកដៃរបស់រុស្ស៊ី គឺជាហេតុផលដ៏ចម្បងមួយនៃការចាញ់ឆ្នោតរបស់លោកស្រី ដោយបានគូសបញ្ជាក់ថា អាមេរិកបានជួយបំភ្លៃព័ត៌មានដើម្បីប្រើប្រាស់សម្រាប់វាយប្រហារប្រឆាំងនឹងរូបលោកស្រី។
លោកស្រី គ្លីនតុន បានលើកឡើងថា «ពួករុស្ស៊ី បើតាមខ្ញុំគិត និងផ្អែកលើព័ត៌មានពីភ្នាក់ងារស៊ើបការណ៍សម្ងាត់ ដែលខ្ញុំបានជជែកជាមួយ មិនអាចដឹងអំពីវិធីសាស្រ្តនៃការប្រើប្រាស់ព័ត៌មានទាំងនោះ ដើម្បីធ្វើជាអាវុធវាយប្រហារនោះឡើយ លុះត្រាតែពួកគេបានទទួលការណែនាំណាមួយ... ពួកគេត្រូវបានជួយត្រួសត្រាយផ្លូវដោយអាមេរិកផ្ទាល់»។ លោកស្រី គ្លីនតុន និយាយបន្តទៀតថា ព័ត៌មានស្ទើរតែទាំងស្រុងស្តីពីរូបលោកស្រី នៅលើបណ្តាញទំនាក់ទំនងសង្គម Facebook សុទ្ធតែជារឿងមិនពិត ដែលជាហេតុបង្កផលប៉ះពាល់យ៉ាងខ្លាំងដល់ បណ្តាអ្នកបោះឆ្នោតដែលទទួលបានដំណឹងតិចតួច។ ម៉្យាងវិញទៀតលោកស្រី បានអះអាងថា មានភ្នាក់ងារចារកិច្ចរុស្ស៊ីចំនួន ១,០០០នាក់ ដែលបានចូលមកពាក់ព័ន្ធក្នុងការចែកចាយព័ត៌មានបំភ្លៃទាំងនោះ តែលោកស្រីមិនបានបញ្ជាក់ឲ្យដឹងពីប្រភពនៃអំណះអំណាងទាំងអស់នេះឡើយ។
មួយវិញទៀត នៅពេលដែលត្រូវបានចោទសួរថា ហេតុអ្វីបានជាកាលពីអំឡុងយុទ្ធនាការឃោសនាបោះឆ្នោត លោកស្រីពុំបានធ្វើដំណើរទៅកាន់រដ្ឋ Wisconsin និងបណ្តារដ្ឋដទៃទៀតដែលលោក ដូណាល់ ត្រាំ បានឈ្នះនោះ លោកស្រី ហ៊ីលឡារី គ្លីនតុន បានទម្លាក់កំហុសទៅលើព័ត៌មានមិនល្អរបស់គណៈកម្មាធិការជាតិប្រជាធិបតេយ្យ ហើយបានប្រៀបធៀបវាជាមួយគណកម្មាធិការជាតិសាធារណរដ្ឋ ដែលលោកស្រីបានចាត់ទុកថា គឺជាស្ថាប័នពោរពេញដោយប្រសិទ្ធភាពពិតប្រាកដមួយ។
ជាចុងក្រោយលោកស្រី គ្លីនតុន បានឆ្លើយពាក្យថា «ទេ» នៅពេលដែលត្រូវបានគេសួរថា តើលោកស្រីអាចនឹងធ្វើការពិចារណា ឈរឈ្មោះដើម្បីប្រកួតប្រជែងយកតំណែងជាប្រធានាធិបតីអាមេរិកសាជាថ្មីម្តងទៀត ដែរឬយ៉ាងណានោះ៕
